la alis cizra je cinri zukte vi le selmacygüe la lojbangirz e lao gy · Lewis Carroll · gy liste leï pagbu nïonïo le fukpi te curmi 1 nïonïo pamoo moïnïa le ractu kevna 2 nïonïo remoo le se klaku lalxu 3 nïonïo cimoo le me la kaukus nu bajra jivna e le clani lisri 4 nïonïo vomoo la ractu cu benji lo cmalu me la bil 5 nïonïo mumoo se djusku lo ciftoldi 6 nïonïo xamoo le xarju e lei tsaprpiperi 7 nïonïo zemoo fenki ke tcati kansïu 8 nïonïo bimoo noltrunïu kelcrkroke bo foldi 9 nïonïo somoo lisri fi la jitfa cakyrespa 10 nïonïo panomoo xasyjukni vonseldansu 11 nïonïo papamoo ma zerlea lei rutytisna 12 nïonïo paremoo le sidydatni poe la alis nïonïo le fukpi te curmi noï dei poi selcku küo petai roda cu selxüa selpüi fi leï gubni selpoe 1 nïonïo pamoo moïnïa le ractu kevna noï la alis coa tatpi le nu zutse le rirxe korbi reo le mensi gïe zukte fi noda · i abuboi soüroi sutra zgana le cukta poi le mensi cu tcidu · i küi cy vasru no pixra ja nuncasnu · i lu jïa ma prali sei la alis pensi fi lo cukta poi vasru no pixra ja nuncasnu lïu i abu cao menli jdice to sekai le xagrai selkae pe vao le nu le glare djedi cu rinka le nu abu lifri le nu sipydji je bebna toi le düu xukau le nu pluka fa le nu zbasu lo xrula linsi cu se vamji le raktu poi nu saïrbïo gïe crepu loi xrula · icabo suksa fa le nu lo blabi ractu poi xunblabi se kanla cu bajra zoa abu i lae dïu noe bae mutce le ka cizra · ijenaijïa la alis jinvi le düu bae mutce le ka nalfadni kei fa le nu tirna le nu le ractu cu sezysku lu oiroa oiroa mi lerci lïu to baku ca le nu abu pensi lae dïu kei abu ri te sidbo le düu ei ri abu cizra · i küi caku piro ri simlu le ka rarna toi · i küi ca le nu le ractu caa lebna lo junla le kosta daski gïe catlu jy gïe dïa sutra kei la alis spaji saïrbïo kïu le nu lindi pagre le abu menli fa le sïo abu pu noroi viska lo ractu poi ponse lo kosta daski a lo junla poi ry kea dy kae lebna · i bai le nu kucli kei abu bajra pagre le foldi gïe jersi ry gïe üadai viska le nu ry canci moïneï lo barda ke ractu kevna noi cnita le spabïu i baziku la alis moïneï jersi ry gïe noroi pensi le düu taï bae makau abu ba zaüreü bartu i le ractu kevna cu vea tubnu sirji gïe suksa nitsalpo li sono · i tai suksa jae le nu la alis na zifre le nu zeïjïasai pensi le nu sezydicra kei pu le nu abu cao farlu fo lo condi mutce jintykea i ga le jintykea cu mutce le ka condi gi abu mutce le ka masno le nu farlu · i nïibo le temci cu mutce banzu ca le nu farlu kei le nu catlu le sruri gïe kucli le düu makau bazi fasnu · i pamai abu troci le nu catlu le cnita gïe facki le düu abu makau klama · i küi dukse le ka manku kei le nu kae viska · i remai abu catlu lei mlana be le jintykea gïe facki le düu my culno loi se kajna tanxe ku joi loi cukta kajna · i abu viska loi cartu ku joi loi pixra vüo noi dandu loi genxu i abu lebna lo botpi pa le kajna ca le nu lampagre · i by se tcita lu najnimre tityjdu lïu gïe küi üanaidai kunti · i abu nae djica le nu falcru le botpi kei müi le nu terpa le nu catra da · isekïubo abu suksa le nu punji by pa le se kajna tanxe ca le nu abu ty farlu lampagre i lu uo sei la alis pensi mi ba lo nu farlu tai ti cu ba nae xanka le nu farlu fo le serti · i lu ua virnu sei le lanzu tüa mi ba jinvi lïu · i üo mi noda cusku vao jïasai le nu mi farlu fi le drudi be le zdani tosaa lae dïu laa jetnu toi lïu i moïnïa moïnïa moïnïa · i xu le nu farlu cu noroi mulno · i lu mi kucli le düu mi ca minli li xokau le ni farlu sei abu cladu cusku · i ia mi püo jibni le midju be le terdi · i kaü minli li vokïo le ni cnita tosaa la alis pu cilre soo da lae dïu le ckule · i züu le cabna na matrai le nu jarco le ka djuno kei kei kïu le nu noda abu tirna · i züunai le nu rapsku cu xamgu abu le nu crebïo toi · i ieseï le se minli cu jibni drani · i küi mi kucli le düu makau ti stuzrlatitudi gïe stuzrlongitudi lïu · i to la alis nasai djuno le düu makau smuni ga zo stuzrlatitudi gi zo stuzrlongitudi · i küi abu jinvi le düu melbi je banli valsi toi i caku abuboi zaüreü coa coe · i lu mi kucli le düu xukau mi ba farlu bae pagre le terdi · i üisai tolcanci le jbini be lei prenu poi cadzu fau le nu le stedu cu cnita · i peï büu le smudukti tosaa caku abu gleki le nu noda tirna kei kïu le nu le valsi nasai drani sance toi · i küi ei mi te preti le gugde le düu makau cmene · i lu peü doi ninmu ti nuzlo gïi sralo tosaa abu troci le nu krorinsa kei ca le nu tavla · i ko se xanri le nu krorinsa ca le nu farlu · i peïpei do kae snada toi · i ny ba jinvi le düu mi toldjuno ke cmalu nixli kei fo le nu mi te preti · i ei mi na te preti · i jüocüi mi viska le nu bao ciska le cmene da lïu i moïnïa moïnïa moïnïa · i kae zukte no drata be lae dïe isekïubo la alis zaüreü coa tavla · i lu jüo la dinas ba mutce le ka se claxu mi kei ca le cabnicte tosaa la dinas cu mlatu toi · i ao da ba morji tüa le dy ladru palta ca le sanmi tcika · i doi dinas noi dirba mi doü au do mi kansa le cnita · i üu no smacu cu zvati le vacri i küi do kae kavbu lo volratcu noi kaü mutce le ka simsa loe smacu · i küi aü xu loe mlatu cu citka loe volratcu lïu · i caku la alis coa sipydji lifri gïe dïa senva sezysku lu xu loe mlatu cu citka loe volratcu · i xu loe mlatu cu citka loe volratcu lïu esüoroibo lu xu loe volratcu cu citka loe mlatu lïu · isejaebo na vajni mutce fa le düu porsi makau kïu le nu abu kae spuda no le re preti · i abu lifri le nu püo sipna kei gïe puzi coa senva le nu abu xanjaisïu cadzu kansa la dinas gïe cusku lu jüi doi dinas ko mi jungau le jetnu · i xu do süoroi citka lo volratcu lïu ca le nu suksa fa le nu abu le cpana be lo derxi be loi grana ku joi loi sudga pezli moü farlu i la alis nasai se xrani gïe zi sanli fi le jamfu gïe catlu le gapru noi küi manku mulno · i crane abu fa lo drata ke clani vorme · i la blabi ractu cu zao se viska gïe sutra le nu litru vy · i ei la alis na denpa · i abu klama tai tüa le brife gïe jaarüe snada le nu tirna le nu ry cusku lu oi doi le mi kerlo joi zbikre doü cao coa lerci lïu i abu jibni trixe ry ca le nu pagre le kojna · iküi ry ca na zao se viska · i abu facki le düu abu zvati lo clani je dziseldru kumfa noi se gusni fi lo se linji noi dandu le drudi i soï vorme cu sruri le kumfa · i küi ro vy cu stela ganlo · i ca le nu la alis bao litru le pamoi mlana e le drata gïe troci tüa ro vorme kei abu badri cadzu büu le midju gïe kucli le düu taï makau abu ba zaüreü bartu ibaziku abu penmi lo cmalu ke cibyseltuple jubme be lo sligu blaci · i cpana jy fa poo lo cmatce ke solji ckiku · i abuboi pamoi jinvi le düu cy ckiku pa le stela be lo kumfa vorme · i küi uinaidai ga le stela cu dukse le ka barda gi le ckiku cu dukse le ka cmalu iseju cy kae kargau noboi sy · i küi ca le remoi abu penmi lo dizlo murta noi abu na pu sanji kea · i my murta lo cmalu vorme noi mitre li jïipivo · i abu troci le nu coe le cmalu ke solji ckiku le stela · i uisaidai mapti i la alis kargau le vrogai gïe facki le düu vy se jersi lo cmalu vorme noi na bramau lo ratcu kevna · i abu cidni sanli gïe catlu le se vorme noi traji le ka melbi kei lei purdi poi süoroi se viska · i aosaidai abu barkla le manku kumfa gïe cadzu jbini lei va zdani be loi carmi xrula beo ku joi lei va lenku jinto · i küi abu na kae gregau le jïasai stedu le vorme · i lu vao jïasai le nu le mi stedu kae pagre kei sei la alis uu pensi sy tolmutce le ka se pilno secau lei mi janco i au mi kae se polje tai tüa loe darvistci · i peï mi kae goï vao le nu mi djuno le düu mi coa goï taï makau lïu · i lei puzi nalfadni fasnu tai soïmei jae le nu la alis coa jinvi le düu soüsai da caa nalcumki i rüadai na prali fa le nu denpa fi tüa le cmalu vorme · isekïubo abu xruti le jubme gïe xadba pacna le nu facki le düu lo drata ckiku jy cpana kei a doanai tüa lo cukta co javni be le nu taï makau polje lo prenu tai tüa loe darvistci · i ca le ca krefu abu facki le düu cpana jy fa lo cmalu botpi to lu noi jüo pu na zvati ti sei la alis cusku lïu toi · i sruri le botpi cnebo fa lo pelji tcita noi lei valsi poü lu ko mi pinxe lïu cu melbi prina kea sepïo loi barda lerfu i oocüi xamgu fa le nu cusku lu ko mi pinxe lïu · i küi la alis noi prije cu na bazi zukte lae dïu · i lu na goï · i pamai mi catlu sei abu cusku gïe facki le düu xukau da sinxa zo vindu lïu · i abu pu tcidu soo melbi ke cmalu lisri be loi verba poi jelca se xrani gïe se citka loi cilce danlu gïe lifri loi drata tolpluka kïu le nu na morji loe sampu javni poi lei pendo cu ctuca küo noü müa le nu loe xunre glare tunta cu jelca xrani loe zao jgari be ty zïe noü müa le nu vao loe nu condi mutce sraku le degji sepïo lo dakfu kei dy tae ciblu cirko · i abuboi noroi tolmorji le düu le nu da dukse le ka pinxe lo se botpi be le se tcita be zo vindu cu bazi ja bazu fanza da i küi le vi botpi na se tcita zo vindu · isekïubo la alis darsi le nu vüirgae le selvau kei gïe facki le nu sy pluka to jeü sy vrusi lo mixre be loe rutrceraso tisna ku joi loe sovykruji ku joi loe bromeli kujoi loe seljukpa xukreü ku joi loe satmatne ku joi loe glare ke matne jelnanba toi · i abu zi moü pinxe * * * * * * * * * * * * * * * * * * * * i lu ue cizra selgae sei la alis cusku · i rüa jüo mi se polje tai tüa loe darvistci lïu i caa coe · i caku abu cenmitre li soü remu · i le abu flira cu cambïo sejae le nu pensi le nu caku abu mapti le cmalu vorme le ka pagre fi le melbi purdi · i küi pamai abu denpa le nu zgana le düu xukau abu zao brajdika · i abu milxe le ka xanka lae dïu · i lu cumki fa le nu se fanmo sei la alis sezysku le nu mi moü canci tai tüa loe lakygaa fagri · i mi kucli le düu mi makau simsa vao daï lae dïu lïu · i abu troci le nu se xanri le düu loe lakygaa fagri makau simsa ba le nu le lakygaa cu se gusydicra · i abu kaenai morji lo nu viska loe tai dacti i bazaku abu ca le nu facki le düu no drata cu fasnu cu jdice le nu zi klama le purdi · i küi la alis uu ca le nu tolcliva le vorme cu facki le düu abu tolmorji tüa le cmalu ke solji ckiku · i ca le nu bao xruti le jubme tezüe le nu cpacu cy cu facki le düu le ni abu galtu cu na banzu le nu cpacu cy · i abu traji troci le nu cpare pa le tuple be le jubme · i küi ty dukse le ka se sakli · i abu uu ca le nu tatpi le nu troci cu zutse gïe klaku i lu ee noda do prali le nu tai klaku sei la alis kinli sezysku i eü ko cazi sisti lïu · i abu tae sezystidi loe xamgu mutce to küi taenai mapti zukte toi gïe süoroi tai junri sezytolzarsku jae loe nu gasnu le nu le se klaku cu zvati le kanla · i abu morji le nu paroi troci le nu darxi le abu kerlo kei müi le nu abu tcica abu ca lo nu abu fapro abu le nu kelcrkroke · i le vi cizra verba cu mutce le ka nelci le nu sruma le düu du re prenu · i lu küi noda mi ca prali sei la alis uu pensi le nu sruma le düu mi du re prenu · i oi le mi ve vimcu na banzu le nu marji fi bae pa se sinma prenu lïu i bazi lo nu abu catlu cu se farna lo cmalu ke blaci tanxe noi cnita le jubme · i abu kargau ty gïe facki lo düu nenri ty fa lo cmalu mutce titnanba noi büu kea lo valsi poü lu ko mi citka lïu se morna lo sudgrute · i lu ai mi ti citka sei la alis cusku · i mi vao lo nu daï gau ti mi brazea cu snada lo nu cpacu le ckiku · i mi vao lo nu daï gau ti mi cmazea cu kakne lo nu reskla nïa le vrogai · i sekïubo mi vao ro fasnu cu kakne lo nu klama le purdi · i mi na se vajni lo düu le mokau caa fasnu lïu i abu citka lo spisa gïe xanka sezysku lu faa ma · i faa ma lïu gïe punji le xance le cpana be le stedu tezüe le nu ganse le nu sy banro faa makau · i abu mutce le ka spaji le nu facki le düu abu stali le nu barda mintu · i lïa laedïu tae fasnu ca loe nu citka lo titnanba i küi la alis tai se tcaci le nu baa no nae tolfadni cu fasnu kei jae le nu simlu le ka tolzdile gïe bebna kei fa le nu le nunjmive cu cao fadni i abu coa coe gïe bazi moü citka le titnanba * * * * * * * * * * * * * * * * * * * * 2 nïonïo remoo le se klaku lalxu i lu cizra je zaüzra sei la alis krixa to abu tai se spaji jae le nu zea tolmorji le nu taï makau tavla bau le drani lojbo toi · i caku mi se tolplo tai tüa loe brarai darvistci · i coo jamfu tosaa ca le nu abu catlu lei jamfu kei jy simlu le ka jibni le ka na kae se viska kei kei kïu le nu cao binxo lo tai darno toi · i uu doi cmalu jamfu ma do ba dasygau lei cutci ku joi lei do smoka doi dirba · i jüo mi ba na kae goï · i mi ba mutce dukse le ka darno do kei le nu kurji do · i ko renvi taï le do xagrai selkae · i küi ei mi jy xendo sei la alis pensi · i vao daï naebo lae dïu jüocüi jy na cadzu vekaa le mi se djica · i ua ai mi dunda ca ro cevjbetersla lo cnino cutci remei lïu i abu cao platu le nu coe taï makau · i lu ei lei cutci cu se mrilu sei abu pensi · i ba xajmi fa le nu benji loi seldüa le voa jamfu · i ua le judri ba simlu le ka cizra · i lu le selsïa ke pritu jamfu be la alis büu la fagzda lolgai nea le fagzüi to la alis prami benji toi lïu · i ue mi bebna tavla lïu i caku le abu stedu cu janli le drudi be le kumfa · i jeü abu ca mitre zaü li repimu · i abu zeï lebna le cmalu ke solji ckiku gïe sutra klama le purdi vorme i la alis uu zoü le nu mlana vreta gïe catlu le purdi sepïo pa kanla cu jimte lei se zukte le ka abu kakne ceü · i le nu pagre cu nalcumki traji · i abu zutse gïe zaüreü coa klaku i lu ei do ckeji sei la alis cusku · i do barda nixli tosaa jüo drani toi · i ïenai cao tai klaku · i leo ko ca sisti lïu · i küi abu zao klaku loi litce be li soï jae le nu abu se sruri lo barda lalxu noi centre li jïipano le ka condi kei gïe preja le xadba be le kumfa i bazaku abu tirna lo nu cmalu stapa le darno kei gïe sutra le nu sudgau lei kanla tezüe le nu viska le nu makau klama · i klama fa la blabi ractu noi xruti gïe melbi dasni gïe jgari lo blabi ke kanba gluta remei ku faü lo barda bifpra le re xance · i ry sutra bajra klama gïe sezysku lu oi la noltronïu zoü baa ny ba cilce fengu vao le nu mi gasnu le nu ny denpa lïu · i la alis tai cinmo le nu tolpacna kei jae le nu bredi le nu cpedu loe nunsidju makau · isekïubo abu ca le nu la ractu cu jibni cu coa cusku sepïo lo lauble je toldarsi voksa lu peü doi ractu lïu · i la ractu cu suksa se jenca gïe falcru lei blabi ke kanba gluta e le bifpra gïe bajra moïneï le manku serai le ka sutra i la alis cu lebna le bifpra e lei gluta gïe coa pilno by müi le nu le kumfa cu glare kei zea le nu cao cusku lu oi ue roda cizra ca le cabdei · i ca le purlamdei roda fadni fasnu · i mi kucli le düu xukau da galfi mi ca le nicte · i ei mi pensi · i xu mi mi mintu ca le nu mi cikna binxo ca le zi cerni · i peïrüe baanai mi cinmo le nu mi frica milxe · i küi vao le nu mi mi na mintu cu jersi preti fa le düu mi du makau · i lae dïu cu barda nabmi lïu · i abu coa pensi ro le verba poi kea abu slabu gïe mintu le ka nanca küo tezüe le nu jdice le düu xukau cumki fa le nu bao galfi abuboi süoboi vy i lu jüo mi na du la adas sei abu cusku · ikïubo ge le abu kerfa cu clani sarlu gi le memimoi cu nasai sarlu · i jïa jüo mi na du la mabel · ikïubo ge mi djuno soï vrici gi my y djuno lo tolmutce · i jïa ge my du my gi mi du mi · i oi ue roda cfipu · i mi mi cipygau le ka ca djuno roda poi mi pu djuno · i pilji li vo li mu fa li pare · i pilji li vo li xa fa li paci · i pilji li vo li ze fa – · i oi mi ba noroi snada tüa li reno vao le nu tai masno · i küi le pilji porsi na vajni · i eü troci tüa le tedyske · i la londn raltca la paris · i la paris raltca la romas · i la romas sa lae dïu naldrani jüo · i jüo pu galfi mi la mabel · i mi troci le nu cusku lu ua le cmalu lïu lïu · i abu punji lei kruca xance lei tuple tai loe nu cusku lo se cilre kei gïe coa sitsku · i küi le voksa cu se sance lo rufsu je cizra · i lei valsi na mintu le se tcaci i ua le cmalu krokodilo cu zengau le ky rebla sïu le djacu pe la nilos le ka camrïojvebla i ua lei jgalu jaa tinsa je cnici preja panra i lei cmafïe cu se rinsa le cisma xedja ganra i lu jüo lei valsi na drani sei la alis uu cusku lïu · i lei abu kanla cu zaüreü tisna loi se klaku ca le nu dïa cusku lu jao mi du la mabel · i mi ba bilga le nu xabju le pindi ke cmalu zdani gïe ponse jïino selkei gïe oi cilre soïsai da · i ai na goï · i mi müo jdice le düu mi ganai du la mabel gi stali ti · i noda ba prali lei bartu prenu le nu py setca le stedu ti gïe cusku lu ko barkla doi dirba lïu · i mi ba faagaü catlu gïe cusku lu pau mi du ma · i pamai ko mi jungau lae dïu · ibabo mi vao le nu nelci le nu du makau cu barkla · i vao le nu na nelci cu denpa ti le nu mi drata lïu · i küi oi sei la alis suksa klaku krica · i au süo da caa setca le stedu ti · i mi tai titpa le nu mi ti nonkansa lïu i abu ca le nu cusku dïu cu faanïa catlu le abu xance gïe se spaji le nu viska le nu abu pu coa dasni pa le cmalu ke blabi ke kanba gluta pe la ractu zea le nu tavla · i lu mi kakne ti ma sei abu pensi i jao mi zaüreü jdika le ka barda lïu · i abu saïrbïo gïe klama le jubme tezüe le nu sezmerli fi jy · i facki le düu ca centre li jïimuno gïe sutra le nu cao jdika · i bazi facki le düu rinka lae dïu fa le nu jgari le bifpra · i sutra falcru by puzi le nu moüsai jdika i lu jibni rivbi sei la alis noi tolmilxe le ka terpa le nu suksa cenba kei kei gïe küi mutce le ka gleki le nu cao zasti cu cusku i ee caku mi klama le purdi lïu · i abu bajra serai le ka sutra kei faa le cmalu vorme · i küi oidai le cmalu vorme cu zaüreü ganlo · i le cmalu ke solji ckiku zaüreü vreta le blaci jubme · i lu le tcini roda xlamau sei le se kecti verba cu pensi · ikïubo mi noroi pu cmalu tai ti · i noroi · i jüa ty mutce le ka xlali jeü lïu i ca le nu abu cusku lei dïu valsi kei le abu jamfu cu sakli · i baziku lo nu jaurjanli zoü le jmajïo bïi firjïo be abu cu jinru lo silna djacu · i pamoi sidbo fa le nu abu bao farlu le xamsi · i lu vao lae dïu mi kae xrukla fu le trene sei abu sezysku lïu to la alis pu klama le xamsi korbi paroi le nunjmive gïejaebo jinvi le düu ro pagbu be le glico korbi cu se zvati soo jinru minji noi nenri le xamsi küo e soo verba noi kakpa lo canre le loldi lo mudri canpa küo e lo porsi be fi loi ginka beo e lo trene tcana noi trixe py toi · i küi bazi abu sanji le nu abu jinru le lalxu pe lei abu se klaku be ca le nu mitre li repimu i lu au mi na pu klaku lo tai mutce sei la alis ca le nu limna gïe troci le nu tolcri lo bartu pluta cu cusku · i rüa sfasa mi lae dïu le nu mrobïo jinru lei mi se klaku · i jüo lae dïu ba cizra · i küi roda cizra ca le cabdei lïu i caku abu tirna le nu da jaurjanli büu le lalxu zaku · i abu jbizea limna tezüe le nu zgana le nu da mokau · i pamai abu jinvi le düu da odbenu ja rirxyxirma · i küi remai abu morji le nu abu makau ca mitre kei gïe bazi viska le nu da smacu poo gïe mintu abu le ka pu sakli i lu xu da mi prali sei la alis pensi le nu tavla le vi smacu · i roda büu le cnita cu tai tolfadni jae le nu peï lakne fa le nu ta kae tavla · iseju noda mi tolprali le nu troci lïu · i sekïuku abu coa coe lu doi smacu xu do se slabu le pluta be le bartu be le büu lalxu · i mi mutce le ka tatpi le nu rüu limna doi smacu lïu to la alis pu jinvi le düu jüo ta drani le ka tadji loe nu tavla lo smacu · i abu boi noroi pu zukte lo simsa gïeküi morji le nu tcidu fi le latmo gerna cukta pe le bruna fe loü lo smacu – seraa lo smacu – sekaa lo smacu – rïi lo smacu – doi smacu leü · i le smacu cu terpreti mutce catlu abu gïe simlu le ka rinsa fi le nu zeï gaorgau pa le cmalu kanla · i küi sy cusku noda i cumki fa le nu ta na se bangu le lojbo sei la alis pensi · i rüa ta fraso smacu gïe kansa la uiliam noü le jamjïa le nu klama ti lïu to abu djuno pisoïda lei purcedra gïeküi na mutce le ka jimpe le düu py pu fasnu za makau toi · i abuboi zaüreü coa cusku zoi fy O est ma chatte? fy noi pamoi lei jufra pe le abu fraso ve cilre cukta · i le smacu cu suksa plipe le bartu be le djacu gïe simlu le ka desku le nu terpa · i lu oiseï ko mi fraxu sei la alis noi xersmadi le düu abu crogau le danlu le cnirango cu sutra krixa · i mi mulno le ka tolmorji le nu do na nelci loe mlatu lïu i lu na nelci loe mlatu sei la smacu cu kinli je cinmo voksa krixa · i xu bae do nelci loe mlatu vao le nu daï do me mi lïu i lu y laanai sei la alis surgau tonga cusku · i ko na fengu · i küi au mi kae jarco le mïa mlatu noü la dinas do · i peï do coa nelci loe mlatu vao le nu daï do dy viska · i dy tai dirba smaji sei la alis tecüurüe le sevzi ca le nu lazni limna le lalxu cao coe · i dy melbi cmoni zutse nea le fagri gïe tacpeü le dy xance gïe lumci le dy flira i dy tai pluka ranti le nu kujyjai · i dy tai certu le nu kavbu loe smacu · i oiseï ko mi fraxu sei la alis noi birti le düu la smacu noi caku tinsa cu jeü cnicro cu zaüreü krixa · i mïo dy na ba dïa casnu vao le nu do zmanei lïu i lu zo mïo ue sei la smacu noi da bïi le jipno be le kea rebla cu desku cu krixa · i jüonaicai mi casnu lo simsa · i le mi lanzu zee xebni loe mlatu · i rigni je tolbaï je malfadni danlu · i eü mi na zaüreü tirna le cmene lïu i lu vïosai sei la alis noi sutra le nu galfi le selsnu cu cusku i xu y xu do y nelci y loe gerku lïu · i la smacu na spuda · isekïubo la alis cao cusku lu lo melbi ke cmalu gerku noi xabju le jibni be le mïa zdani zoü mi djica le nu mi gy do jarco · i gy cmalu gerku la terier gïe se kerfa lo clani je sarlu je bunre gïe xrubei lei dacti poi do renro · i gy faagaü zutse gïe cpedu le sanmi gïe zukte soï vrici noi mi kaenai morji pimu lüo kea · i gy se ponse lo te cange noi xusra le düu gy tai se pilno jae le nu gy se vamji lo rupnu be li panono · i cy xusra le düu gy catra ro le ratcu · i oiseï sei la alis xenru tonga krixa · i mi xersmadi le düu mi ta zaüreü cnixai lïu · i la smacu cao limna too abu serai le ka vlipa kei gïe mutce le ka kalsygau le lalxu ca le nu klama i abu xutla trisku lu doi smacu dirba ko zaüreü xruti · i nüedoü mïo ba casnu genai loe mlatu ginaijïa loe gerku vao le nu do na nelci lïu · i ca le nu la smacu dïu tirna kei sy dutselfarbïo gïe masno limna xruti abu · i le flira cu mutce le ka blabi to jae le nu cinmo sei la alis pensi toi · i sy lauble je desku voksa cusku lu eü mïo klama le korbi · ibabo mi do jungau le mi lisri · i do ba jimpe le düu makau krinu le nu mi xebni loe mlatu e loe gerku lïu i ca mapti tcika le nu cliva kei kïu le nu le lalxu cao tisna loi cipni ku joi loi danlu vüo poi bao farlu ly · i la datka la cipnrdodo la cipnrlori la cipnrxakuila soo drata noi vrici je cizra danlu · i la alis lidne · i piro le girzu cu limna sekaa le korbi 3 nïonïo cimoo le me la kaukus nu bajra jivna e le clani lisri i jeü cizra simlu gunma co jmaji le se rirxe · i lei cipni zoü le pimlu cu dandu · i lei danlu zoü le kerfa cu jibni snipa · i le romei zoü cilmo carmi gïe fengu gïe nae kufra i le pamoi co preti cu lïa düu taï makau zaüreü sudga · i casnu laedïu · ibabo zi lo mentu be li soü cu simlu le ka rarna kei fa le nu la alis cao pendo tavla le romei tai le nu daï abu se slabu ra zea le nu abu jmive · i jeü abu pu zeü daupro la cipnrlori noi uo badri carna gïe cusku lu mi do tolcitmau gïejaebo junmau lïu poo · i lae dïu zoü la alis na curmi secau le nu djuno le düu ly nanca makau · i kïu le nu la cipnrlori cu jea tolsarxe le nu cusku le düu ly makau nanca cu na se sumji se cusku i uo la smacu noi simlu co catni le romei cu krixa lu ko zutse doi rodo gïe tinjüi mi · i bae mi bazi sudgau do lïu · i le romei cazi zutse gïe barda djine co se midju la smacu · i la alis cao xanka catlu sy kïu le nu abu birti le düu coa bilma bai le nu na sudga baziku i lu taa sei la smacu cu vajni simlu cusku · i xu ro do bredi · i laedïe cu sudrai piro loi se djuno be mi · i ro ko smaji eo · i lu la uiliam poi jamjïa zïe noi le jdaralpre cu zanru le jamna te zukte be fi kea cu zeï trubïo loi glepre noi kea turni djica gïe pu mutce co se tcaci le nu trubasti je jamjïa · i la eduin joi la morkar vüonoü lei turni be la mersias faü la nortumbrias lïu lïu i lu oünai sei la cipnrlori cu cusku je desku lïu i lu keopeü sei la smacu cu cusku je frumu jekeküi clite mutce · i xu do cusku lïu i lu mi na goï sei la cipnrlori cu sutra co cusku lïu i lu mi pu jinvi le düu jaa goï sei la smacu cu cusku · i mi dïa cusku · i lu la eduin joi la morkar vüonoü lei turni be la mersias faü la nortumbrias cu xusra sevaü ubu · ije la stigand jïasai noü le naijgi ke ralju jdagidva pe la kanterburis cu facki fi da fe le düu se djica lïu lïu i lu facki fi bae ma sei la datka cu cusku lïu i lu lu facki fi bae da lïu sei la smacu cu spudu co fengu milxe i lïa do djuno le düu zo da sinxa makau lïu i lu mi jaa djuno le düu zo da sinxa makau kei ca le nu mi facki sei la datka cu cusku fi da noi soeroi banfi ja curnu · i le preti zoü fi ma facki fa le ralju jdagidva lïu i la smacu na sanji le dïu preti · ije sutra co xruti cusku lu lu facki fi da fe le düu se djica fa le nu kansa la edgar atelin le nu penmi la uiliam gïe friti fi ubu fe le nu turni · i le nuntra be la uiliam ca le nu cfari cu fadni · i küi le nuntolclite be lai norman ne ubu lïu · i pei doi do iu sei sy cao cusku jecabo carcra be la alis lïu i lu cilmo düi le nu pu cilmo sei la alis badri cusku · i simlu le ka nasai sudgau mi lïu i lu · isekïubo sei la dodos junri cusku co saïrbïo be fi lei tuple mi stidi le düu le nu penmi cu se tolcfarïi tezüe le nu nalmocteicau plicüa lo tol- cadmau daftadji lïu i lu ko tavla bau la lojban sei la cipnrxakuila cifnu cu cusku · i mi na se slabu le smuni be süopimu lei dïu clani valsi · ije peï do jïa na goï lïu · i la cipnrxakuila cifnu cu krogau le stedu müi le nu mipri le nu cisma · i pisüo lei drata cipni cu mïamli co se tirna i lu mi pupüo cusku sei la dodos se xrani cusku le se düu le traji be le ka se jalge le nu sudgau mïo cu me la kaukus nu bajra jivni lïu i lu kïa me la kaukus nu bajra jivni sei la alis cusku lïu · i abu nae mutce co djica le nu djuno · i küi la dodos pu denpa tai le nu dy jinvi le düu bae da ei tavla · ije no drata pu simlu le ka djica le nu cusku de i lu jeü sei la dodos cusku le xagrai co ciksi tadji cu nu zukte lïu to jïa kïudaï le nu do jïa djica co troci ca lo dunra donri kei mi cusku le sedüu la dodos zukte makau toi i pamai dy finti lei sinxa be le nunbajra pluta beo noi cukla milxe to le satci tarmi na vajni sei dy cusku toi · ibabo punji le romei le pluta vifaüvaku · i cusku no lu · i pa · i re · i ci · i ko bajra lïu · i küi coa bajra ca le nu djica · ije coü bajra ca la nu djica · isekïubo na frili fa le nu djuno le düu moü makau bajra jivni i küi ca le nu bao bajra zea lo cacra be li pimujïi gïe zaüreü jea sudga kei la dodos spaji kixsku lu le nu jivni cu mulno lïu · i le romei cu denmi sanli gïe vasxu mutce gïe te preti fi lu küi ma jinga lïu i le dïu preti zoü la dodos na kakne co danfu secau le nu pensi mutce · ije dy zeü zutse fau le nu pa degji cu danre le firgapru kei to le se tarmi be la ceikspir bei vao lei pixra be ri toi ca le nu lei drata cu denpa je smaji · i uo la dodos cusku lu bae ro da cu jinga ije ei ro da se cnemu lïu i lu küi ma dunda le se jinga sei le voksa soïmei cu te preti lïu i lu lïa bae ta lïu se cusku la dodos noi sinxa la alis sepïo pa degji · ije le romei bazi denmi je sanli je sruri abu gïe se cfipu kixsku lu au se jinga · i au se jinga lïu i la alis cu na milxe jïasai co djuno le düu ei zukte makau · ije kïu le nu dunku kei abu punji le xance le daski · ije vimcu le bïu tanxe be lei titydja to üa le silna djacu na pagre le tanxe le nenri toi gïe fairgau lei titydja lei jinga · i satci fa le nu ro zvati cu te dunda pa titydja i lu küi ei dunda lo se jinga bae ta lïa sei la smacu cu cusku lïu i lu lïa sei la dodos cu spuda co junri · i do ponse ma poi drata zïepe neï le do daski sei dy jmina cusku je carcra be la alis lïu i lu lo tajgai poo sei la alis badri cusku lïu i lu ko ta mi dunda sei la dodos cusku lïu ibabo le romei cu zaüreü denmi je sruri abu ca le nu la dodos junri dunda le tajgai gïe cusku lu mïa pikci do le nu do cpasarxe le vi melbi tajgai lïu · ije ca le nu dy moü cusku le tordu se cusku kei le romei cu geirkrixa i la alis cu jinvi le düu piro le tcini cu mutce co cizra · i küi le romei cu simlu le ka junri kei jae le nu abu na darsi le nu cmila · i jïa abu kïu le nu na sanji le düu ei cusku makau cu krobïo rinsa gïe lebna le tajgai serai le ka junri simlu i le bavlaï cu nu citka lei titydja · i le goï cu rinka lo nu savru gïe cfipu kei kïu le nu lei barda cipni cu pante le nu na kakne le nu vüirgae le mebycy · moi kei kei e le nu lei cmalu cu nandu vasxu gïe nitcu le nu se darxi fo le trixe · i küi fanmo uo · ije le romei cu zaüreü zutse co djine gïe pikci la smacu le nu dïa cusku i lu do nupre le nu cusku le citri be do sei la alis cusku e le düu kïu makau do xebni y my e gy lïu seke jmina cusku abu noi smaji gïe terpa rüe le nu daï sy se xrani zaüreüku i lu le lisri pe mi cu clani je se badri sei la smacu cu cusku je carcra be la alis je dricmo lïu i lu clani jeü linsi sei la alis cusku co manci catlu be le rebla be la smacu · i küi kïu ma do ly mïa skicu le ka se badri lïu · i abu cao manci lae dïu ca le nu la smacu cu cusku jae le nu le abu sidbo be le rebla linsi cu simsa dïe la fengu lo smacu noi fy kea cpacu cu penmi le zdani · i fy dïe jungasnu · i ïa no prokïu · i ei flajvisïu · i ca le ca cerni no drata cu fasnu · i eo mi farlu sei le smacu cu darlu · i secau lo pairkamni lïa mïo nolpratra · i oü na vajni · i je bae mi pajni sei la fengu cu cusku le nu do se catra i lu do na jundi sei la smacu fi la alis cu junri cusku · i do pensi ma lïu i lu ienai gaïnai sei la alis toljgira cusku · i do coa cusku le mumoi be lei kruvi peï lïu i lu · ije ge na goï gi na cumki sei la smacu cu krixa co cladu jeke fengu mutce lïu i lu ui jgena lïu se cusku la alis noi roroi bredi le nu sidju zïe noi rüu xanka catlu · i lu ui eocai mi do sidju le nu luzgau jy lïu i lu ai mi curmi no simsa sei la smacu cu cusku je saïrbïo je cliva · i do mi tolsïa fau le nu do cusku lo tai nonselsmu lïu i lu ainai goï sei la alis uu pikca · i küi füi jeü do selxaicni lïu i la smacu cu spuda fi le nu cmoni poo i lu eosai ko xruti klama gïe moü cusku le lisri be fi do sei la alis kixsku lïu · i lei drata cu kansa co cusku lu goï eocai lïu · i küi la smacu cu desygau poo le stedu gïenai depsarxe gïe sutyzea le ka cadzu i lu uu na stali lïu se xersku la cipnrlori cazi le nu mutce co nae se viska · ije le tolcïo cakyjukni cu cabmoi cusku fi le tixnu be ri fe lu ie doi dirba iu be mi · i ao ctuca do le nu do noroi fengu lïu · i lu ko na cusku doi mamta sei le citno cakyjukni cu cusku · i do jai banzu le nu fegygau loe xamsi cakcurnu lïu i lu ao la dinas vi zvati jüocai sei la alis fi no steci cu bacru cusku · i dy cazi cpacu daï lïu i lu la dinas kïa vao le nu mi zifre le nu te preti sei la cipnrlori cu cusku lïu i la alis cu djicni spuda kïu le nu roroi bredi le nu tavla fi le abu danlu · i lu la dinas cu memïamoi mlatu · ijïa certu jeü le nu kavbu loi smacu · i ui au do viska dy ca le nu jersi loi cipni · i jeü dy loe cmalu cipni düigi catlu gi citka lïu i le dïu se cusku cu se jalge lo banli nu cinmo savru raï lei zvati · i lo cipni cu sutra le nu cliva · ibo pa tolcïo cipnrpika coa cliva brebïo gïecabo cusku lu eijeü mi zdakla · i le nicte vacri na mapti le galxe be mi lïu · ije lo cipnrkanario cu nalsto voksa kixsku fi lei panzi fe lu ko klama doi dirba · i jeü ca tcika le nu ro do cu sipna büu le ckana lïu · i kïu loi vrici le romei cu cliva · ije la alis cu bazi kansa no da i lu au mi na pu tavla fi la dinas sei abu sezysku co badri · i no da pe viku cu nelci dy peï · i küi jüo dy xagrai piro loi mlatu pe le munje · i oi doi dinas iu ïi xu mi do ba zaüreü viska lïu · i caku la alis uu coa zaüreü klaku kïu le nu abu cinmo le ka mutce co nonkansa je badri · ibazibo küi abu cu zaüreü tirna le nu vu stapa · ije abu djicni galvïa gïe milxe co pacna le düu la smacu cu te sidbo fi lo drata gïe xruti tezüe le nu moü cusku le lisri 4 nïonïo vomoo la ractu cu benji lo cmalu me la bil i me la blabi ractu noi masno bajra xruti gïe xanka ke sruri catlu ca le nu klama kei tai le nu ry da pu cirko · i abu tirna le nu ry lauble sezysku lu oi la noltronïu · i oi la noltronïu doi dirba xance be mi doi skapi be mi doi zbikre be mi zoü ny da mi ba catrymïe jüosai · ijo ro mabrnfuru cu mabrnfuru · i mi koa ma falcru lïu · i la alis zi smadi le düu ry sisku le bifpra e le blabi ke kanba gluta remei · i abu noi xendo cu coa sisku koa · i küi koa na se viska · i roda simlu le ka bao cenba kei ba le nu abu limna le lalxu · i le barda kumfa poi vasru le blaci jubme e le cmalu vorme cu bao mulno canci i baziku la ractu cu sanji la alis noi rüu sisku küo gïe fengu kixsku fi abu fe lu ue doi meri,An do ma zukte büu le bartu · i ko ca bajra klama le zdani gïe bevri lo gluta remei e lo bifpra mi · i ko sutra lïu · i la alis cu tai terpa jae le nu abu zi bajra faa le farna poi ry jarco küo gïe na troci le nu ciksi le se srera be ry i lu tu ba se spaji le nu facki le düu mi makau du · i küi ee mi bevri le bifpra e lei gluta tu y vao le nu daï mi tolcri lïu · i abu ca le nu cusku dïu cu penmi lo cnici ke cmalu zdani noi le kea vrogai cu se dandu lo carmi lastu tapla noi le cmene poü lu blabi ractu lïu bao se ciska fi kea · i abu nerkla secau le nu vrodarxi kei gïe sutra le nu serti cpare kei gïe terpa le nu penmi le caa me la meri,An gïe gau barkla le zdani pu le nu tolcri le bifpra e lei gluta i lu ua cizra sei la alis sezysku fa le nu mi selfu lo ractu · i rüa zaümai la dinas mi ba minde lïu · i abu coa se xanri loi klesi be lei cuntu beo poi daï fasnu · i lu doi nix alis ko ca klama ti gïe bredi le nu cadzu lïu · i lu mi bazi klama doi kurji · i küi ei mi jundi le vi kevna gïe fanta le nu le smacu cu barkla lïu · i lu küi ianai curmi sei la alis dïa coe le nu la dinas cu stali le zdani vao le nu dy coa tai minde lei prenu lïu i caku abu zvati lo cnici ke cmalu kumfa noi lo jubme cu lamji le canko be kea gïe se cpana to düi le abu se pacna toi lo bifpra e jïici cmatce ke blabi ke kanba gluta remei · i abu lebna le bifpra e pa le gluta remei gïe püo cliva le kumfa ca le nu catlu faa lo cmalu botpi noi sanli le jibni be le minra · i ca le ca krefu noda by tcita fïo jufra lu ko mi pinxe lïu · i küi abu gacri vimcu gïe punji by le abu ctebi · i lu jüo ca ro nu mi pinxe ja citka da kei sei abu sezysku bae de poi cinri cu fasnu · isekïubo mi ba zgana le nu le vi botpi makau gasnu · i ao ti gasnu le nu mi zaüreü banro lo barda · i mi mutce le ka tatpi le nu tai cmatce lïu i jaa caa gasnu lae dïu · i goï pu le se pacna be abu · i pu le nu abu moü pinxe le xadba be le se botpi kei le abu stedu cao catke le drudi · i abu bilga le nu korcu kei le nu marbi le cnebo le nu porpi · i abu sutra le nu punji le botpi kei gïe sezysku lu banzu · i ao mi coü banro · i caku mi kaenai pagre le vorme · i au mi na pu pinxe lo tai mutce lïu i oi dukse le ka lerci kei fa le nu djica lae dïu · i abu banro gïe zao banro gïe bazi bilga le nu sanli le loldi lei cidni · ibazibo le canlu na banzu lae dïu jïasai · i abu troci le nu vreta gïe punji nüige lo cidni le lamji be le vorme gi le drata birka le sruri be le stedu · i küi abu zao banro · i uo abu tolsea lo birka pao le canko gïe setca lo jamfu le danmo tubnu gïe sezysku lu uo mi kaenai gasnu lo bancu · i mi ma ba lifri lïu i zanfüa la alis fa le nu le cmalu ke makfa botpi ca mulno le ka ceü makau rinka · i abu ca na banro lo bramau gïe küi mutce le ka tolkufra · i zaa na cumki fa le nu abuboi zaüreü bartu le kumfa isekïubo abu tolgei uenai i lu le mi zdani ti mutce zmadu le ka pluka sei la alis uu pensi i büu zy genai roroi zenba joi jdika ginai roroi se minde loi smacu e loi ractu · i aunairüe mi na klama fo le ractu kevna · i küi · i küi cizra fa le tai nu jmive · i mi jaa kucli le düu mi makau caa lifri · i mi ca le nu tcidu loi crida lisri cu krici le düu loe tai cuntu noroi fasnu · i caku mi cy midju · i ei da finti lo cukta mi · i ie ei goï · i ai mi ca le nu bao banro cu finti · i küi mi ca bao banro sei abu badri jmina · i baünai le büu canlu na banzu le nu banro lo bancu lïu i lu küi jao sei la alis pensi mi ba noroi zenba le ka tolcitno i lae dïu pluka · i mi noroi tolcitno ninmu · i küi mi roroi cilre da ei · i oi aunai goï lïu i lu oi doi alis noi bebna sei abu sezyspuda taï ma do da büu kae cilre · i ue le canlu jaarüe banzu tüa do · i noda büu canlu lei ve cilre cukta lïu i abu cao coe · i pamai darlu lo mlana gïe remai darlu le drata gïe zbasu lo vajni nuncasnu le romei · i küi ba lo mentu be li soo abu tirna lo voksa noi bartu küo gïe sisti tezüe le nu tinzga i lu doi meri,An doi meri,An sei le voksa cu cusku ko bevri lei mi gluta mi caku lïu · ibabo tirna lo nu cmalu ke jamfu stapa lei serti · i la alis djuno le düu la ractu cu klama tezüe le nu sisku abu i abu desku jae le nu le zdani cu desku · i abu tolmorji le nu ge abu ca kilto la ractu le ka barda gisekïubo noda krinu le nu terpa ry i caku la ractu cu tolcliva le vorme gïe troci le nu kargau vy · i küi kïu le nu ge ei le vrogai faaneï karbïo gi le cidni be la alis cu catke vy kei le se troci cu se fliba · i la alis tirna le nu ry sezysku lu ai mi srukla gïe nerkla fo le canko lïu i lu na ba goï sei la alis pensi lïu · i abu denpa le nu krici le düu tirna le nu la ractu cu cnita le canko · ibazi abu jai suksa fai le nu pejgau le xance gïe jgari le vacri · i abu kavbu noda gïeküi tirna lo cmalu se krixa e lo nu farlu e lo porpi blaci sance gïe nibjïi lae dïu le düu cumki fa le nu ry farlu lo guzme tanxe a lo simsa ibabo lo fengu voksa to be la ractu toi coe lu jüi pat jüi pat do ma zvati lïu · ibabo lo voksa noi abu kea na pu tirna küo lu jüo mi ti zvati · i mi kakpa sisku loe plise doi banli lïu i lu oonai kakpa sisku loe plise sei la ractu cu fengu cusku · i ko mi klama gïe sidju le nu mi bae ti bartu lïu to sance loi drata ke porpi blaci toi i lu pau reï pat ta poi zvati le canko cu mo lïu i lu jüo ta birka doi banli lïu to py bacru zoi zoi birrrka zoi toi i lu birka doi bebna · i ma pu viska lo birka poi tai barda · i ta se tisna piro le canko lïu i lu jüo goï doi banli · i küi ta caa birka lïu i lu · iseju noda va cuntu ta · i ko ta vimcu lïu ibabo zeü smaji · i la alis soüroi tirna loi lauble selsku noü müa lu jüo mi na nelci doi banli · i nasai goï lïu e lu ko zukte tai le mi te minde doi tolvri lïu · i uo abu rereü pejgau le xance gïe rereü jgari le vacri · i caku tirna re cmalu se krixa e lo porpi blaci sance drata · i lu ue xokau guzme tanxe cu zvati sei la alis pensi · i aü ma bazi se zukte · i le nu lacpu mi pao le canko zoü au kakne · i jüo mi na djica le nu zao stali ti lïu i abu zea denpa gïe tirna no lo zaümoi · i romai tirna lo sance be lo cmalu carce xislu e soïsai voksa noi tavla kansïu · i abu snada le nu jimpe tüa lei valsi · i lu le drata serti ma zvati · i ua ei mi bevri le pamei · i la bil cu coe le drata · i jüi bil ko ta ti bevri doi citno · i ko ta punji le vi kojna · i na goï · i puku ko ta jonsimgau · i ta zao na preja lo galtu banzu · i jüo ta ba xamgu banzu i ko na tcila jundi · i jüi bil ko jgari le vi skori · i xu le drudi ba sarji · i ko jundi le va kluza tapla · i oi ta cao farlu jüi cnita tosaa cladu popsna toi · i ma ta gasnu · i rüa la bil · i ma ba cnita klama fo le danmo tubnu · i mi na · e ko goï · i ai mi na goï · i la bil ba goï · i jüi bil le selseü do minde le nu do cnita klama fo le danmo tubnu lïu i lu aa eipei la bil cnita klama fo le danmo tubnu sei la alis sezysku · i süa la bil bilga le nu zukte roda · i mi na basti la bil gïu te pleji lo mutce · i le vi fagzda jaa jarki · i küi peï mi kae tikpa milxe lïu i abu tolsea le jamfu le tubnu selaü le kakne traji gïe denpa le nu tirna lo cmalu danlu to abu na smadi le düu danlu makau toi noi sraku je srukla neï le tubnu gaünea abu · ibazi abu ca le nu sezysku lu ti me la bil lïu cu paroi kinli tikpa gïe denpa le nu zgana le nu makau ba fasnu i pamai abu tirna lo voksa soïmei pe lu ta moï me la bil lïu · i remai goï le ractu voksa pe lu ko ta jgari doi le lamji be le spati jimte · i cimai goï lo smaji · i vomai goï lo drata ke voksa kalsa pe lu ko sarju le stedu be ta · i gau ko ta pinxe lo jikru · i ko ta na vaxydicra · i ma mo doi pendo · i do ma pu lifri · i ko mïa jungau lae dïu lïu i romai goï lo cmalu je ruble je lauble voksa to lu ta me la bil sei la alis pensi lïu toi pe lu mi jaarüe djuno · i banzu kïe · i mi ca kufra · iküi mi dukse le ka jenca kei le nu jungau · i mi djuno le poo düu da mi catke tai lo danre selkei plipe · i mi tolfaü tai tüa loe tsani jakne lïu i lu ie do caa goï doi pendo sei lei drata cu cusku lïu i lu ei mïo jelgau le zdani sei la ractu voksa cu cusku lïu · i la alis krixa serai le ka cladu kei lu ganai goï gi mi ba jeïcru la dinas do lïu i zi smaji mulno · i la alis pensi lu aü ta ma ba zukte · i ei vao le nu prije cu vimcu le drudi lïu · i bazi lo mentu be li jïire coa zaüreü rüu muvdu · i la alis tirna le nu la ractu cu cusku lu pa carcylai cu banzu le nu coa coe lïu i lu pa carcylai noü bae ma sei la alis pensi lïu · i küi abu zeü na senpi · ibazi soï cmalu bidju cu carvi pao le canko · i süoboi by darxi abu fo le flira · i lu mi ti ba tolcfagau sei abu sezysku lïu i abu krixa lu leo ko na zaüreü coe lïu · i laedïu cupra lo drata ke smaji mulno i la alis se spaji sanji le nu ro le bidju cu binxo lo cmalu nanba ca le nu vreta le loldi · i lo carmi coa sidbo fi le abu menli · i lu le nu mi citka pa le nanba kei sei abu pensi ba jüo rinka le nu mi cenba le ka barda · i kaenaisai brazengau mi · i jao jüo peï cmazengau mi lïu i sekïubo abu tunlo pa le nanba gïe gleki le nu facki le düu ca coa cmazea · i abu ca le nu cmalu banzu le nu pagre le vorme cu bajra klama le bartu be le zdani gïe penmi lo soïmei be loi cmalu danlu joi cipni beo noi denpa · i le cmalu rebyrespa uu noü la bil midju le romei gïe se sarju re smacrkobaiu noi dunda lo se botpi · i roda sutra faa la alis ca le nu abu tolcanci · i küi abu too bajra serai le ka sutra kei gïebazi snura zvati lo denmi ricmei i lu ei pamai sei la alis ca le nu rüu cadzu büu le ricmei cu sezysku mi zaüreü banro le mi barda · i ei remai mi tolcri le melbi purdi · i peï laedïu cu xagrai selpla lïu i jüo xamgu selpla · i cnici je sampu · i papoo nabmi zoü abu te sidbo le nu coa coe kei naku le cmarai jïasai · i ca le nu abu xanka catlu rüu lei tricu kei lo cmalu ke kinli se bacru noi vi gapru le abu stedu cu gasnu le nu abu faagaü sutra catlu i lo bratce gerpanzi faanïa catlu abu sepïo loi barda je cukla kanla gïe ruble tengau lo xance gïe troci le nu pencu abu · i lu uu doi dirba lïu se cusku la alis sepïo lo xlura tonga · i abu mutce le ka troci le nu siclu · i küi mutce terpa le sïo gy xagji noi laa nibli le nu gy citka abu müinai le nu abu xlura i abu jaarüe sanji le nu abu lo cmalu grana cu lafti gïe jarco le gerpanzi · ijaebo le gerpanzi cu plipe le vacri ro le jamfu gïe se pluka cmoni gïe sezreo le garna gïe gasnu le nu simlu le ka gunta ri ibabo la alis rivbi le nu janli kei le nu muvdu le trixe be lo barda cpinyspa · i ca le nu abu tolcanci le drata mlana kei le gerpanzi zaüreü sezreo le grana gïe gunro farlu sejae le nu sutra troci le nu jgari gy · ibabo la alis noi jinvi le düu simsa loe nu kelci lo braxirma zïe noi terpa loe nu se stapa fi le gy jamfu cu zaüreü bajra faatïa le cpinyspa · i le gerpanzi coa sooroi zeï gunta le grana gïe veïfaa je veütoo bajra gïe roroi rufsu bacru gïe romai vu zutse gïe taïrvaü gïe se tance le dandu be le moklu gïe se kanla lei xadba ganlo i le cabna cu simlu fi la alis fe le ka xamgu mapti le nu cliva isekïubo abu zi coa coe gïe bajra coü le nu mutce tatpi gïe vasxu claxu e le nu le se bacru be le gerpanzi vu se sance lo ruble mutce i lu küi dirba ke cmalu gerpanzi sei la alis noi surla le nu vreta lo mat- nyxrula kei gïe pilno lo my pezli le nu cupra lo brife cu cusku · i mi mutce nelci le nu ctuca tu loi seltra vaodaï le nu mi mapti fi le ka barda · i oi mi jibni tolmorji le nu ei mi zaüreü banro i aa ei mi ma zukte · i rüa ei mi citka ja pinxe da · i küi le banli preti zoü goï ma lïu i jüo le banli preti cu me zo ma · i la alis faarüu catlu lei xrula e lei srasu gïe küi viska noda poi simlu le ka mapti loe se citka ja pinxe · i lo barda mledi cu zvati lo jibni be abu gïe simsa abu le ka galtu · i abu ca le nu bao catlu le cnita e le re mlana e le trixe be my kei cu te sidbo fi le düu ee catlu gïe viska le nu makau cpana my i abu tcena jïu lei jamfu jipno gïe catlu le bancu be le korbi be le mledi · i lei abu kanla cu penmi lei kanla be lo barda ciftoldi noi zutse le cpana zïe noi lei kea birka cu se polje zïe noi smaji damvaü sepïo lo clani nargile zïe noi jundi genai abu gi no drata 5 nïonïo mumoo se djusku lo ciftoldi noï la ciftoldi ku joi la alis zea simxu le nu smaji catlu · i bazubo la ciftoldi cu bevri le nargile fo le moklu gïe oüdai aïnaidai cusku fi abu i lu do du bae ma sei la ciftoldi cu cusku lïu i dïu na xamgu mukti le nu coa casnu · i la alis toldarsi spusku lu mi y · i mi nae mulno djuno doidoü gaïnai ca le cabna · isaünai mi djuno le düu mi du makau ca le nu mi ckana cliva ca le cabycerni · iküi peï mi sooroi se galfi ba lae dïu i lu ma dïu do smuni sei la ciftoldi cu tolxendo cusku · i ko ko ciksi lïu i lu üu mi na kakne le nu mi mi ciksi doidoü gaïnai sei la alis cusku · ikïubo uadai mi na du mi lïu i lu uanai sei la ciftoldi cu cusku lïu i lu üu mi na kakne le nu xagmau cusku deü sei la alis clite mutce spuda kïu le nu züu mi na jimpe lae deü · ije le nu mitre soïda zea lo donri cu cfipu mutce lïu i lu na goï sei la ciftoldi cu cusku lïu i lu oocüi ïa do zao na facki sei la alis cusku · iküi peï do ca le nu binxo lo todbïolanka to jüodai do bacaa binxo ca da toi gïebabo binxo lo toldi cu ba milxe le ka se cizra peïpei lïu i lu peïnaisai sei la ciftoldi cu cusku lïu lu oocüi jüocüi do cinmo lo drata sei la alis cusku · i mi djuno le düu daï bae mi cinmo loe se cizra lïu i lu bae do gaï sei la ciftoldi cu tolsïa cusku · i do du bae ma lïu i dïu xrugau le remei le krasi be le nu taarsïu · i la alis milxe fanza le nu la ciftoldi cu cusku loe tordi mutce pinka kei gïe sanli zenba gïe junri mutce cusku lu peï ei do cusku puku le sedüu bae do du ma lïu i lu kïu ma sei la ciftoldi cu cusku lïu i lae dïu jïa cfipu preti · i la alis na kakne le nu pensi lo xamgu krinu · ijebo la ciftoldi cu simlu le ka nae se zdile · isekïubo abu coa cliva i lu ko xruti sei la ciftoldi faa abu krixa · i ei mi cusku le vajni lïu i lae dïu cinri simsa jüo · i la alis torni gïe xruti i lu ko surla stali sei la ciftoldi cu cusku lïu i lu xu lae dïu cu mulno sei la alis cusku lïu · i abu ralte le nu fengu tai le xagrai nu abu kakne i lu na goï sei la ciftoldi cu cusku lïu i la alis jdice le düu denpa kei kïu le nu ge noda se zukte gi cumki fa le nu cy jungau abu lo se vamji be le nu tirna · i cy zea lo mentu be li soo cao damvaü gïe na tavla · i romai cy tolpolje lei birka gïe zaüreü lebna le nargile le moklu gïe cusku lu jao do jinvi le düu do bao cenba · i xu goï lïu i lu oi mi bao cenba doidoü sei la alis cusku · i mi na kakne le nu morji loe du tai le nu mi pu nao noa · i jïa mi na stodi le ka mitre kei zea lo mentu be li süopano lïu i lu na kakne le nu morji bae ma sei la ciftoldi cu cusku lïu i lu mi pu troci le nu sitna lu ua le cmalu gunkybifce lïu · i küi ri se bacru jae lo frica sei la alis badri mutce voksa spuda lïu i lu ko sitna lu do tolcitno doi paf uiliam lïu sei la ciftoldi cu cusku lïu i la alis polje lei xance gïe coa coe dïe do tolcïo doi paf uiliam sei le citnau cu cusku i le kerfa be do caa blabi i ue do le loldi le stedu cu sanli i do jinvi xu le düu drani i ca le mi nuncïo sei la uiliam spuda mi terpa le nu mi se benxai i caku jüosai mi noda se besna i uisai mi roroi kae coe i sei le citnau cu cusku do keü tolcïo gïe bao binxo lo plana i küi do plipe puzi vi le vorme i ma krinu le nu kae goï i ca le mi nuncïo sei le ruskre prije cu cusku mi rotsu se xadni sepïo le vi kruji noi fepni li pa i xu do te vecnu lo remei i do tolcïo sei cusku · i se xedja co ruble fi ro da poi jarmau lo grasu i küi le gunse do müo se citka i aü taï ma do snada i ca le mi nuncïo mi flaraa gunka gïe darlu roda le speni i le jalge ke sluji kamtsa pe le xedja cu renvi fi le mi nunjmive i do tolcïo sei cusku · i nandu co sruma le nu le do kanla cu vlipa i küi lo xasycurnu gau do nazbi lanxe i ma rinka le nu do tai certu i mi bao spuda ci preti noi banzu sei le patfu cu cusku · i ko cumla i peïpei mi do ba tirna zeesai i ko cliva · inaja mi do tikpa i lu dïu na drani se cusku sei la ciftoldi cu cusku lïu i lu üu na mulno drani sei la alis toldarsi cusku · i süo le valsi bao se galfi lïu i lu toldrani coa le cfafanmo coü le tolcfafanmo sei la ciftoldi cu birti cusku lïu · i smaji zea lo mentu be li soo i la ciftoldi cu tavla pamoi i lu aupei do clani mitre ma sei cy te preti lïu i lu ue · i le düu mitre makau na vajni sei la alis sutra spuda i na nelci le nu tai cafne fa le nu cenba · i do djuno lïu i lu mi bae na djuno sei la ciftoldi cu cusku lïu i la alis cusku noda · i abu pu tai se fapro noroi le abu nunjmive gïe ca cinmo le nu fengu binxo i lu xu do ca se mansa sei la ciftoldi cu cusku lïu i lu y au mi brazea doi doü sei la alis cusku · i le nu cenmitre li ze cu mutce le ka mabla lïu i lu iasai mutce le ka zabna sei la ciftoldi cu fengu cusku lïu · i cy sanli binxo ca le nu tavla to cy satci cenmitre li ze toi i lu küi mi na se tcaci sei la alis kecti tonga pante lïu · i abu pensi lu au lei vi danlu na tai jai frili fai le nu se cnixrani lïu i lu do ba se tcaci sei la ciftoldi cu cusku · i cy punji le nargile le moklu gïe coa zaüreü damvaü i caku la alis denpa lenu cy dïa tavla · iba lo mentu be li jïire la ciftoldi cu vimcu le nargile le moklu gïe jïireroi sipfru gïe desku · i cy cliva le gumri gïe cpare le srasu le darno gïecabo piksku poo lu pa mlana do clazengau · ije le drata mlana do torzengau lïu i lu pa mlana be bae ma · i le drata mlana be bae ma sei la alis pensi lïu i lu le gumri lïu se cusku la ciftoldi tai le nu daï cy tirna le abu selpensi · ibazibo canci i la alis pensi zgana le gumri zea lo mentu gïe troci co facki le düu le re mlana cu du makau · i gy prane cukla · isenïibo le nabmi cu nadycai · iküi ca le fanmo abu tengau lei birka rüu le gumri vea le selküe gïe popygau sepïo ro le re xance le korbi lo cmalu i lu ma faü ma mo faü mo sei abu sezysku lïu · i cmabatci le pritu cmalu tezüe lenu cipra fi le selrïa · ibazibo ganse lo vlile nundarxi le xejnïa · i ri darxi le jamfu i abu carmi terpa le suksa nunstika · iküi cinmo le nu ei na xaksu le temci · imüibo abu sutra tolbao · ije zi coa zukte lenu citka pisoü le drata cmalu · i le abu xedja cu tai tagji te damre le jamfu jae le nu carmi nandu fa lenu kargau le moklu · iküi ca le fanmo cu kargau gïe snada lenu tunlo lo pagbu be le zunle cmalu ******* ****** ******* i lu ua le stedu be mi cu zifre lïu se cusku la alis fïo tonga le ka gleki poi bazi binxo le ka tepselspaji kei ca lenu facki le düu na kae tolcri le janco · i abu faanïa catlu gïe viska lo tcebra clani cnebo poo noi stani simsa sanli le xamsi be fi lo nïavu crino pezli i lu le va crino cu bae mo sei la alis cusku · i lei mi janco bao klama ma · i oi doi xance be mi kïu ma mi nalkae le nu viska do lïu · i abu muvgau xy ca le nu tavla · i küi se jalge lo poo cmalu nu desku fa lei darno ke crino pezli i le nu muvgau lei xance le stedu cu simlu le ka na cumki isekïubo abu troci le nu muvgau le stedu lei xance · i abu mutce gleki le nu facki le düu le cnebo cu jai frili fai le nu krobïo faa roda tai tüa loe since · i abu bao snada le nu krobïo jae lo melbi zigzagi kei gïe bredi le nu sfubu le jbini be lei pezli noi abu facki le düu kea nae drata le gapru be lei tricu noi nïa kea abu pu klama · icabo lo kinli se bacru cu gasnu le nu abu sutra tïekla · i lo barda tcacpi pu vofli faa le abu flira gïe vlile darxi abu le nalci i lu ii since sei la tcacpi cu krica lïu i lu mi bae na since sei la alis fengu cusku · i oi ko mi cliva lïu i lu since keü sei la tcacpi cu mlimau rapsku lïu · i ty klaku jmina lu roda poi mi troci zoü da na mansa sy lïu i lu mi jimpe noda le te tavla be fi do sei la alis cusku lïu i lu mi troci tüa loe tricu genja · ije mi troci tüa loe rirkoi ije mi troci tüa loe spabïu sei la tcacpi secau le nu jundi abu cu cusku · iküi noda pluka loe since lïu i la alis zenba le ka cfipu ceü · iküi abu pensi le düu noda prali le nu jmina cusku pu lenu la tcacpi cu moü tavla i lu nandu fa lenu kurji le sovda kei poonai sei la tcacpi cu cusku · ije jïa ei mi mi kajde loe since zea le nicte e le donri · i zee le jeftu be li ci mi sipna noda lïu i lu mi mutce xenru le nu do se fanza sei la alis noi coa jimpe le smuni be fi cy cu cusku lïu i lu mi posycüa le tricu galrai be le ricfoi sei la tcacpi cu krixa zenba ke ranji cusku · icabo mi pensi le düu uo mi zifre fi le nu sincycau · i ue torni klama fi le tsani · i oi since lïu i lu küi jüasai mi bae na since sei la alis cusku · i mi y · i mi lïu i lu aa do bae mo sei la tcacpi cu cusku · i mi zgana le düu do troci co finti da lïu i lu mi y cmalu nixli lïu la alis se cusku co senpi kïu lenu morji le nu soïroi selstika zea le ca dorni i lu lisri lakne ianai sei la tcacpi cu tolsïarai tonga cusku i mi zeepu viska soï cmalu nixli · iküi nori se cnebo lo simsa be ta · i ienaicai · i do since · ije eenai do tolxüa · i laa do bazi cusku le sedüu do zeepu na vüizga lo sovda lïu i lu mi jaa vüizga lo sovda sei la alis noi mutce jetsku verba cu cusku · iküi kaü loe cmalu nixli cu dunli loe since le ni citka loe sovda lïu i lu ianai sei la tcacpi cu cusku · isenïibo loe cmalu nixli cu since da · i mi jao cusku dïu lïu i le sidbo tai cnino la alis jae le nu abu smaji zea lo mentu be li jïire · i lae dïu curmi le nu la tcacpi cu jmina lu jüosai do sisku loe sovda · i na vajni mi fa le düu do cmalu nixli gïikau since lïu i lu mutce vajni bae mi sei la alis sutra cusku · i küi jeü mi na sisku loe sovda · i jïa mi romüei le düu jaa goï cu nae djica lei me do moi · i mi na nelci loe nalseljukpa sovda lïu i lu ko cliva vaoku sei la tcacpi cu tolxendo tonga cusku lïu · i ty cu zaüreü zutse le ty zdani · i la alis dzikla le jbini be lei tricu serai le kamxamgu verai lei selkae vao le nu le abu cnebo ku joi lei jimca cu zao se jgena · i soïroiku abu bilga le nu tolseltoï cy · i baku abu morji le nu abu zao jgari lei gumri spisa lei xance · i abu coa junri zukte le nu citka pa spisa pamai e le drata remai · i abu süoroi zenba gïe süoroi jdika · iromai abu snada le nu tcaci clani i abu pu mitre lo drani jibni zu lo tai mutce jae le nu cizra ca le cfari · i küi abu se tcaci binxo zea lo mentu be li soü gïe dïa tae sezytavla · i lu uo le xadba be le mi selpla bao se zukte · i üe lei büu nuncenba cu cizra · i mi noroi birti le düu mi ba binxo makau zi lo mentu · i küi mi bao xruti le ka drani mitre · icaku ei nerkla le melbi purdi · i aü taï ma zukte lae dïu lïu · i abu ca le nu cusku dïu cu suksa tolcliva lo klina noi vasru lo cmalu zdani noi mitre li jïipa i lu romüei le düu makau xabju ta kei sei la alis pensi na drani fa le nu mi tolcanci tai le nu mi ca mitre · i vaoku mi terpygau mutce lïu · i sekïubo abu coa zaüreü citka le pritu spisa gïe na darsi le nu jbikla le zdani kei pu le nu bao jdika jae le nu cenmitre li reno 6 nïonïo xamoo le xarju · e lei tsaprpiperi i zea lo mentu abu sanli gïe catlu le zdani gïe pensi le düu ei bazi zukte makau · icabo lo selfu poi dasni le manfytaü cu bajra cliva le ricmei to abu jinvi le düu sy selfu kei fo le nu sy dasni lo manfytaü · i abu vao daï nae bo lae dïu ca le poo nu viska le flira cu te cmene sy zo finpe toi gïe cladu darxi le vorme le degycidni · i vy karbïo gau lo drata manfytaü dasni selfu noi se flira lo cukla gïe se kanla lo barda tai tüa loe plipybanfi · i le re selfu sei la alis sanji zoü le kerfa cu pumvau gïe cukla gacri piro le stedu · i abu mutce co kucli le düu srana makau kei gïe parkla lo milxe co bartu be le ricmei kïu le nu tinjüi i pamai la finpe selfu cu tolsae fi le cnita be le sy birka fe lo barda xatra noi jibni dunli sy le ka barda · i sy dunda xy le drata gïe junri tonga cusku lu fi la noltronïu cu fitytïi fa la noltrunïu fe le nu kelcrkroke lïu · i la plipybanfi selfu cu mintu fi le ka junri tonga kei gïe milxe stika le valsi porsi gïe refsku lu fa la noltrunïu cu fitytïi fi la noltronïu fe le nu kelcrkroke lïu ibabo le remei cu krobïo rinsa simxu · i lei kerfa be le remei cu xrebïo i la alis tai cmila müi lae dïu jae le nu bilga le nu bajra xruti le ricmei kïu le nu abu terpa le nu ry tirna abu · i ca le nu abu cu zaüreü mipri catlu kei ge le finpe selfu bao cliva gi le drata cu zutse le loldi nea le vorme gïe bebna catlu faa le tsani i la alis toldarsi klama le vorme gïe darxi i lu noda do prali le nu darxi sei la selfu cu cusku · i goï kïu reda · i pamai mi do dunli le ka zvati le mokau mlana be le vorme · i remai neï cupra lo tai savru jae le nu noda kakne le nu tirna do lïu · i jüo lo tolfadni savru cao nenri · i rüi cmoni je senci · i rüinai barda sance tai loe nu lo palta a lo patxu cu porpi i lu peüdoü sei la alis cusku mi nerkla taï ma lïu i lu le nu do darxi cu racli sei la selfu secau le nu jundi abu kei dïa coe vao le nu daï mi do sepli le vorme · i müa vao le nu daï do nenri kei ge do darxi gi mi curmi le nu do barkla lïu · i sy catlu le tsani zea le nu tavla · i la alis jinvi le düu jüosai sy tolclite lae dïu · i lu küi jüocüi ta na kakne co rivbi lae dïu sei abu sezysku i lei ta kanla tai jibni le gapru be le stedu · iseju ei ta spuda loe preti · i mi nerkla taï ma sei abu cladu ke krefu cusku lïu i lu mi zutse ti sei la selfu cu te pinka coü le bavlamdei lïu i caku le vorme be le zdani cu karbïo · i lo barda palta cu sfubu le bartu faasai le stedu be le selfu · i py jaarüe pencu le sy nazbi gïe porpi janli lo tricu poi trixe sy i lu a le bavlamji remoi djedi lïu dïa se cusku le selfu sepïo le mintu tonga tai le nu daï noda fasnu i lu mi nerkla taï ma sei la alis sepïo lo lauzma tonga zaüreü retsku lïu i lu xu do bae jaa nerkla sei le selfu cu cusku · i dïu pamoi loi preti lïu i lïa lae dïu jetnu · i küi la alis na nelci le nu te cusku dïu i lu oi sei abu bacru sezysku ro le danlu cu darlu · i banzu le nu fenkygau lïu i la selfu cu simlu le ka jinvi le düu mapti le nu zaüreü te pinka · i lu mi ti ba zutse sei sy cusku rüinaiku zea lo djedi be li soï lïu i lu küi ei mi ma zukte sei la alis cusku lïu i lu lo se djica be do sei le selfu cu cusku lïu · i sy coa siclu i lu oi noda mi prali le nu tavla ta sei la alis tolpacna cusku i ta prane bebna lïu · i abu kargau le vorme gïe nerkla i le vorme cu pluta lo barda jupküa noi culno lo danmo vea pa le fanmo kubïi le drata · i la noltronïu cu zutse lo cibyseltuple stizu büu le midju gïe kurji lo cifnu · i le jukpa cu korcu gaü le fagri gïe jicla doe lo barda patxu noi simlu le ka culno lo stasu i lu jüo pidüe tsaprpiperi cu zvati le va stasu sei la alis noi rüi senci cu sezysku lïu i pidüe boi ty zvati jüo le vacri · i la noltronïu jïacai cu rüinai senci · i le cifnu zoü cy rüi desfau senci joi kakcmoni · i ro jupküa zvati poi na senci cu du le jukpa a le barda mlatu poi zutse le fagystizu gïe relkerlo ganra cisma i lu eo ko mi jungau sei la alis noi milxe terpa rïa le nu na birti le düu xukau le nu pamoi tavla cu clite cu cusku le düu le do mlatu tai cisma müi makau lïu i lu ta tcicymlatu sei la noltronïu cu cusku · i laedïu krinu · i do xarju lïu i lenu ny tcevlile bacru le romoi valsi cu mukti lenu la alis suksa plipe · iküi abu bazi jimpe ledüu ny tavla le cifnu enai abu isemüibo virnu lenu dïa cusku lu mi na djuno le düu loe tcicymlatu cu roroi gancisma · i jüo mi na djuno le düu loe mlatu cu bae kakne loe nu gancisma lïu i lu roboi my kakne sei la noltronïu cu cusku · ije soeboi my caa zukte lïu i lu mi na djuno fi süo boi my poi caa zukte sei la alis tceclite cusku lïu · i abu mutce se pluka le nu jorne fi le nunsimtavla i lu do na djuno soï da sei la noltronïu cu cusku · ije lae dïu fatci lïu i la alis nasai nelci le tonga pe le pinka gïe jinvi le düu xamgu fa le nu cfagau lo drata selcasnu · i le jukpa ca le nu abu troci co cuxna sy cu lebna le patxu be lo stasu le fagri gïe coa zukte le nu renro ro se kuspe be jy la noltronïu ku joi le cifnu · i lei fagri tirse cu pamoi · ibabo jersi fa lo tansi joi palta joi palne carvi · i la noltronïu nae jundi cajïasai le nu darxi ny · i le cifnu pu cao tai mutce krixa jae le nu nalcumki fa le nu djuno le düu xukau lei nundarxi cu crogau i lu oi eosai ko kurji le do se tarti sei la alis terpa dunku plipe krixa · i oi uu le ta melbi nazbi lïu ca le nu lo nalfadni barda tansi cu vofli zoa ny gïe narüe beirvïu ny i lu romüei le düu roda kurji le da cuntu kei sei la noltronïu cu rufsu cmoni cusku le munje cu zenba le ka carna sutra lïu i lu lae dïu na prali sei la alis noi mutce gleki le nu kae jarco pisoü le nu abu djuno cu cusku · i ko pensi le nabmi poi lae dïu kea rinka seraa loe donri e loe nicte · i kaü le nu le terdi cu carna le jendu cu cacra li revo lïu i lu loe nu catra zoü sei la noltronïu cu cusku ko vimcu le stedu ti lïu i la alis xanka catlu le jukpa tezüe le nu zgana le düu xukau jy zukte fi le nu tinbe · i küi le jukpe cu jicla le stasu gïe simlu le ka na jundi · isekïubo abu dïa cusku lu cacra li revo peï ji li pare pei · i mi lïu i lu oi ko mi na fanza sei la noltronïu cu cusku · i mi kaenai renvi loe namcu lïu · icabo ny coa zaüreü kurji le cifnu gïe sanga lo sipygau simsa cy gïe vlile desygau cy ca le fanmo be ro vlalïi ko rufsu tavla le do panzi i ko py senci sfasa i le nu poo py do fanza cu ia te zukte krasi KREFU (to le jukpa le cifnu cu kansa toi) ua ua ua i la noltronïu ca le nu sanga le remoi be lei vlagri cu cao vlile renro le cifnu le gapru ku joi le cnita · i le se kecti cmalu cu tai krixa jae le nu la alis cu jaarüe tirna lei valsi mi junri tavla le mi panzi i mi py senci sfasa i lïa py se pluka banzu i tsaprpiperi stasu KREFU ua ua ua i lu jüidoü ea do ti kurji sei la noltronïu ca le nu renro le cifnu la alis cu cusku · i ei mi mi bredygau le nu kansa la noltrunïu le nu kelcrkroke lïu · i ny sutra cliva le kumfa · i le jukpa cu renro lo tansi ny ca le nu ny barkla · i küi jaarüe fliba le nu darxi i la alis cu milxe nandu kavbu le cifnu kïu lenu cizra seltai ke cmalu danlu gïe tengau le birka e le jamfu fo roda · i lu tai loe mumbircurnu sei la alis pensku lïu · i le cmalu uu cu vruvaü tai loe jacfebmatra ca lenu abu kavbu · isekïubo abu zea lo mentu be li jïire na kakne lo zmadu be lenu jgari i abu zi ba le nu facki le düu makau drani tadji le nu kurji cy to noü le nu tongau cy jae lo jgena gïe tagji jgari le cy pritu kerlo ku joi le cy zunle jamfu jae le nu rivbi le nu cy sezytolplo toi cu bevri cy le bartu vacri · i lu lei du romüei le düu mi na lebna le vi cifnu sei la alis pensi cu ba catra cy za lo djedi be li jïire · i xu na zekri fa le nu cliva cy lïu · i abu cladu cusku lei romoi valsi · i le cmalu cu spuda cmoni to cy ca bao senci toi · i lu ko na cmoni sei la alis cusku · i nasai drani tadji le nu cusku lïu i le cifnu cu zaüreü cmoni · i la alis xanka mutce catlu le flira be cy tezüe le nu facki le düu cy mokau · i jüo cy se nazbi lo gapfaa noi loe xajyzbi cu zmadu loe reazbi le ka kea simsa ceü · ijïa lei kanla be cy cao binxo lo mutce cmalu fi loe cifnu kanla · i toü la alis nasai nelci le jvinu be le dacti · i lu küi jüocüi ti kakcmo poo sei abu pensi lïu · i abu cu zaüreü catlu le cy kanla tezüe le nu facki le düu xukau lo dirgo bao se klaku i na coe · i no dirgo bao se klaku · i lu ganai do binxo lo xarju doi dirba sei la alis junri cusku gi oï mi do coü srana lïu · i le se kecti cmalu zaüreü kakcmo to goï gïa xajycmo · i na cumki fa le nu jdice toi · i le remei dïa coe zea lo smaji i la alis coa pensi sezysku lu ei mi zukte le nu mo le vi danlu kei ca le nu mi tolcliva le zdani lïu ca le nu cy cu zaüreü cmoni tai le ka vlile kei jae le nu abu xalni milxe catlu le cy flira · i caku na senpi · i cy zmadu najenai mleca xarju · i abu jinvi le düu le nu abu cao bevri cy cu fenki mutce isekïubo abu punji le danlu le loldi gïe coa mutce tolxanka le nu viska le nu dy smaji bajra faaneï le ricmei · i lu le cifnu romüei le düu banro sei abu sezysku cu tolmelbi mutce verba · i küi peï ta caa melbi xarju lïu · i abu coa pensi lo drata verba noi kea slabu abu gïe daï se xamgu le nu kea xarju · i abu sezysku lu au djuno le düu makau drani tadji le nu galfi da lïu ca le nu abu milxe se spaji le nu viska la tcicymlatu noi zutse lo jimca be lo tricu va lo mitre be li süo i la mlatu cu cisma poo ca le nu viska la alis · i my simlu le ka xendo sei abu pensi · i küi my se jgalu loi clani mutce gïe se denci lo soïsaimei · isekïubo abu jinvi le düu ei sinma my i lu doi tcicymlatu lïu · i abu toldarsi cfasku kïu le nu nasai djuno le düu xukau my nelci le cmene · i küi my ganzea cisma poo · i lu ua ta se pluka caku sei la alis pensi lïu · i abu dïa cusku lu eo ko mi jungau le düu ei mi klama zoe ti makau lïu i lu lae dïu jalge le düu do djica le nu klama makau sei la mlatu cu cusku lïu i lu tüa makau na vajni mi y sei la alis cusku lïu i vao lae dïu na vajni fa le nu do klama fo makau sei la mlatu cu cusku lïu i lu y romüei le düu mi klama bae da sei la alis ciksi jmina lïu i lu ua jüo do caa coe sei la mlatu cu cusku romüei le düu do cadzu zea lo banzu lïu i la alis jinvi le düu lae dïu kaenai te darlu · isekïubo abu troci tüa lo drata preti · i lu loi mo prenu cu xabju le vi sruri lïu i lu vufaa tu sei la mlatu cu pritu xance desku cusku cu xabju la mapypre · i vufaa tu sei drata xance desku cu xabju la cibmasti cicyractu · i ko vitke le do se nelci · i le reda fenki lïu i lu küi mi na djica le nu jbini loi fenki sei la alis te pinka lïu i lu oo do kaenai rivbi sei la mlatu cu cusku · i ro maa vi fenki · i mi fenki · i do fenki lïu i lu do jinvi le düu mi fenki kei fo ma lïu i lu jüo do coe sei la mlatu cu cusku · ija do na bao klama ti lïu i la alis nasai jinvi le düu lae dïu cu jeürjao · i küi dïa cusku lu do jinvi le düu do fenki kei fo ma lïu i lu pamai sei la mlatu cu cusku loe gerku na fenki · i iepei lïu i lu ierüe sei la alis cusku lïu i lu kaü sei la mlatu cu dïa cusku loe gerku cu cmoni ca loe nu fengu kei gïe rebla deskygau ca loe nu gleki · i züunai mi cmoni ca loe nu gleki kei gïe rebla deskygau ca loe nu fengu · isenïibo mi fenki lïu i lu mi te cmene fi zo pukcmo enai zo cmoni sei la alis cusku lïu i lu ko te cmene fi lo do se nelci sei la mlatu cu cusku · i xu do kansa la noltrunïu le nu kelcrkroke ca le cabdei lïu i lu mi mutce le ka nelci lae dïu sei la alis cusku · i küi mi zao na te friti lïu i lu do mi ba büu viska sei la mlatu cu cusku lïu · i my canci i la alis na mutce se spaji lae dïu kïu le nu abu cao coa se tcaci loe nu loi cizra cu fasnu · i la mlatu ca le nu abu catlu le pu se zvati be my cu zaüreü tolcanci i lu tao le cifnu cu mo sei la mlatu cu cusku · i mi jibni tolmoïzüe le nu te preti lïu i lu bao binxo lo xarju sei la alis tai le daï nu my fadni xruti cu lauble cusku lïu i lu mi pu jinvi le düu goï sei la mlatu cu cusku lïu · i zaüreü canci i la alis zeï denpa gïe xadba pacna loe nu zaüreü viska my · i küi my na tolcanci · i baku abu za lo mentu be jïire cu dïa cadzu faa le se cusku se xabju be la cibmasti cicyractu · i lu mi pu viska loe mapypre sei abu sezysku · i la cibmasti cicyractu cu mutce zmadu fi le ka cinri · i laacüi cycy kïu le düu ca mumymasti cu na traji fenki · i na tai fenki düi loe nu noa ca le cibmasti lïu · i abu ca le nu cusku dïu cu faagaü catlu · i la mlatu cu zaüreü zvati gïe zutse lo jimca be lo tricu i lu pau do cusku zo xarju ji zo narju sei la mlatu cu cusku lïu i lu mi pu cusku zo xarju sei la alis spuda · i au do na zao suksa canci je tolcanci · i do gasnu le nu mutce le ka se cfipu lïu i lu jee sei la mlatu cu cusku lïu · i caku my masno mutce canci coa le fanmo be le rebla coü le nu cisma noi zea renvi ba le nu le drata pagbu bao canci i lu ue mi soïroi viska loe mlatu pe secau loe nu cisma sei la alis pensi · i küi ua loe nu cisma pe secau loe mlatu · i traji le ka cizra kei lei se viska be mi bei zee le nu mi jmive lïu i abu zeünai klama pu le nu viska le zdani be la cibmasti cicyractu · i abu jinvi le düu drani zdani kei kïu le nu le damtüu cu tarmi loe kerlo kei e le nu le drudi cu se gacri loe skapi · i le zdani cu tai barda jae le nu abu na nelci le nu jbikla pu le nu citka pisoü le zunle spisa be le mledi kei e le nu gasnu le nu abu banro lo mitre be li jïipimu · isevaojïasaibo abu toldarsi milxe cadzu faa zy gïe sezysku lu rüa cycy caa traji fenki · i aunairüe mi sebaï pu klama le nu viska la mapypre lïu 7 nïonïo zemoo fenki ke tcati kansïu i lo jubme cu bredi nïa lo tricu caü le zdani · i la cibmasti cicyractu e la mapypre cu pinxe lo tcati · i la sipsmacu cu zutse jbini le remei gïe carmi sipna · i le remei cu pilno sy le nu kicne kei gïe vregau lei bircidni sy gïe tavla simxu gaü le sy stedu · i lu tolkufra mutce rïi la sipsmacu sei la alis pensi · i küi peï sy vao le nu sipna cu na se vajni lïu i le jubme cu barda · i küi le cimei cu tagji jmaji le kojna be jy · i lu canlu nomei · i canlu nomei sei le remei ca le nu viska le nu la alis klama cu krixa lïu · i lu canlu bae zaüraumei sei la alis fengu cusku lïu · i abu tsebïo lo barda birstizu büu lo fanmo be le jubme i lu ee cpacu lo vanju sei la cibmasti cicyractu cu cusku co zanru lïu i la alis catlu piro le jubme · i küi no nae tcati jy cpana · i lu mi na viska lo vanju sei abu piksku lïu i lu no vy zvati sei la cibmasti cicyractu cu cusku lïu i lu oonai vao lae dïu do na clite le nu friti sei la alis fengu cusku lïu i lu do na clite le nu tsebïo secau le nu se zvacpe sei la cibmasti cicyractu cu cusku lïu i lu mi na pu djuno le düu le jubme cu me bae do moi sei la alis cusku · i jy bredi tüa lo zaüsaicimei lïu i lu le do kerfa cu nitcu le nu se katna sei la mapypre cu cusku lïu · i my pu zeü mutce kucli catlu la alis gïe ca pareü tavla i lu ei do cilre fi loe nu na cusku loi prenu pinka sei la alis cusku co junri · i mutce tolclite lïu i la mapypre cu kargau lei kanla jae le nu mutce ganra kei ca le nu tirna dïu · i küi my cusku lu ma te simsa loe cipnrkorvo loe ciska jubme lïu poo i lu ui mi zeaba se zdile sei la alis pensi · i mi gleki le nu coa retsku loi se manci nabmi · i mi jinvi le düu mi kae smadi lae dïu sei abu bacru jmina lïu i lu xu do skudji le düu do jinvi le düu do kae facki le danfu be dïu sei la cibmasti cicyractu cu cusku lïu i lu goïsai sei la alis cusku lïu i lu ei do cusku le do se skudji sei la cibmasti cicyractu dïa cusku lïu i lu mi goï sei la alis sutra spuda · i y jüorüe y doanai mi skudji le mi se cusku · i kaü lae dïu mintu lïu i lu na mintu sei la mapypre cu cusku · i do düi kae cusku le düu lu mi viska le mi se citka lïu mintu lu mi citka le mi se viska lïu lïu i lu do düi kae cusku sei la cibmasti cicyractu cu jmina le düu lu mi nelci le mi se cpacu lïu mintu lu mi cpacu le mi se nelci lïu lïu i lu do düi kae cusku sei la sipsmacu noi simlu le ka sipna tavla cu jmina le düu lu mi vasxu zea le nu sipna lïu mintu lu mi sipna zea le nu vasxu lïu i lu jaa mintu seraa do sei la mapypre cu cusku lïu · icabo le nunsnu cu te denpa · i le kansïu cu smaji zutse zea lo mentu cao le nu la alis pensi piro da poi abu morji kea loe cipnrkorvo a loe ciska jubme zïe noi na mutce i la mapypre cu pamoi lei coü smaji · i lu le xomoi be le masti cu detri sei my faa la alis cusku lïu · i my le junla bao cpacu le daski gïe cao xanka catlu gïe dïinai desygau gïe jbipüi le my kerlo i la alis zeï pensi gïe cusku lu le vomoi lïu i lu oirïe srera laü lo djedi be li re sei la mapypre cu cusku · i mi do pu jungau le düu loe matne na mapti le minji sei my jmina lïu i my fengu catlu la cibmasti cicyractu i lu ra bae xagrai lei matne sei la cibmasti cicyractu cu cumla spuda lïu i lu goï · i küi laa loi jïa nanba spisa cu nerbïo sei la mapypre cu pante · i einai do ra pu setca sepïo le nanba dakfu lïu i la cibmasti cicyractu le junla cu jgari gïe tolgei catlu gïe jirgau le kabri tcati gïe rereü catlu · i küi cycy na kakne co pensi lo se cusku poi xagmau le pamoi pinka noü lu gaïcüi ra bae xagrai lei matne lïu i la alis pu cao kucli catlu gaü le cycy janco · i lu aü xajmi junla sei abu te pinka · i ue jy sinxa le düu le xokaumoi be le masti cu detri enai küi le düu makau tcika lïu i lu ei kïu ma jaa goï sei la mapypre cu cusku · i xu le bae do junla cu sinxa le düu le xokaumoi nanca cu detri lïu i lu lïa na goï sei la alis spuda co mutce sutra · i küi lae dïu se krinu le nu zeü stali fa le pa nanca lïu i lu mïu le me bae mi moi sei la mapypre cu cusku lïu i la alis cinmo le ka mutce se cfipu · i le pinka be fi la mapypre cu simlu le ka noda smuni kea kei gïe küi jaa lojbo · i lu mi na mulno jimpe sei abu serai le kamclite verai lei selkae cu cusku lïu i lu la sipsmacu zaüreü sipna sei la mapypre cu cusku lïu · i my falcru pisoü glare tcati le sy nazbi i la sipsmacu cu tolsurla desygau le stedu gïe cusku secau le nu kargau le kanla kei lu lïa lïa · i dïusai püo pinka fi mi lïu i lu xu do bao smadi tüa le manci nabmi sei la mapypre fi la alis cusku lïu i lu na goï · i mi te jinga sei la alis spuda · i ma danfu lïu i lu mi na te sidbo dïu lo jïasai cmarai sei la mapypre cu cusku lïu i lu goïrao sei la cibmasti cicyractu cu cusku lïu i la alis cu tatpi patyvaü · i lu peï do kae se prali le temci sei abu cusku taï lo xagmau be le nu xaksu ty taï le nu preti fa lo manci nabmi poi na se danfu lïu i lu do romüei le düu se slabu la temci düi le nu mi noa sei la mapypre cusku cu na pilno zo le le nu cmene ty · i zo la mapti lïu i lu mi na jimpe le düu do skudji makau sei la alis cusku lïu i lu lïa do na goï sei la mapypre cu stedu muvgau tolsïa cusku · i laa do noroi tavla jïasai la temci lïu i lu ierüe sei la alis kajde spuda · i küi jüo ei mi darxi doe le temci ca le nu mi cilre le nu se zgike lïu i lu ua lae dïu ve ciksi sei la mapypre cu cusku · i ty na nelci loe nu darxi · i ty boi romüei le nu se pendo do cu gasnu soa se nelci be do rïi le junla · i müa daï li so ca tcika le nu coa tadni · i banzu fa le nu do jaarüe stidi fi ty kei le nu le junla moü zeï cuklïu i uo li pacipimu ca tcika le nu citka lïu to lu au goï sei la cibmasti cicyractu cu lauble sezysku lïu toi i lu lae dïu daï banli jüo sei la alis pensi cusku · i küi vaoku mi na xagji lïu i lu ierüe goï ca le cfari sei la mapypre cu cusku · i küi ee li pacipimu zao tcika zeü lo do se djica lïu i lu xu lae dïu tadji le nu bae do zukte sei la alis retsku lïu i la mapypre cu tolgei desygau le stedu · i lu na goï sei my spuda · i mïa daarsïu ca le puzi cibmasti · ibazibo ty fenki binxo zaadai sei my le tcati smuci le nu farjao la cibmasti cicyractu cu pilno · i fasnu ca le banli ke zgike se tigni be la risna noltrunïu · i mi bilga le nu sanga dïe i güirgüi doi volratcu i üe aü do ma klatcu i aü xu le selsanga do slabu lïu i lu mi pu tirna lo simsa sei la alis cusku lïu i lu dïa coe sei la mapypre dïa cusku dïe i do munje gapru vofli tcatypalne simsa trofli i güirgüi lïu · i caku la sipsmacu cu desyzüe gïe coa sanga ca le nu sipna lu güirgüi güirgüi lïu gïe zeü zao coe jae le nu sarcu fa le nu tunta sy kei le nu stigau sy i lu noï mi puzi bao mulgau le pamoi pempau sei la mapypre cu cusku ca le nu la noltrunïu cu zunti gïe krixa lu ta catra le temci · i ko le stedu ta vimcu lïu lïu i lu oi seltea cilce sei la alis kïasku lïu i lu coa lae dïu sei la mapypre dïa tolgei cusku ty zukte no se cpedu be mi · i ca zee rüi tcika fa li xa lïu i lo carmi sidbo cu se pensi la alis · i lu ua xu lae dïu krinu le nu soï ue tcati dacti cu zvati sei abu retsku lïu i lu jaa goï sei la mapypre cu cusku je vaürpante · i rüi tcika le tcati sanmi · i mïa noroi kakne le nu lumci lei dacti ca lo jbini lïu i lu jao rüa do zao muvdu fo lo cukla sei la alis cusku lïu i lu goï sae sei la mapypre cu cusku ca le nu soo le dacti moü se xaksu lïu i lu küi ma fasnu ca le nu do xruti le cfari sei la alis retsku darsi lïu i lu eü mïo galfi le se casnu sei la cibmasti cicyractu cu zunti je sipfru · i mi ti tatpi · i mi sarji le nu da lisri zoe le citno ninmu mïa lïu i lu üu noda mi slabu sei la alis noi xanka le se stidi cu cusku lïu i lu vao lae dïu la sipsmacu ba coe sei le remei cu se krixa · i ko cikybïo doi sipsmacu lïu · i le remei cu tunta sy le re mlana ca le mintu i la sipsmacu cu masno kargau le kanla · i lu mi na pu sipna sei sepïo lo rufsu je ruble voksa sy cusku · i mi pu tirna ro valsi poi do doi cimei cao cusku lïu i lu ko te lisri fo mïa sei la cibmasti cicyractu cu cusku lïu i lu eo goï peü sei la alis cpesku lïu i lu jïa ko sutra sei la mapypre cu jmina · isevaonaibo do ba sipna pu le nu mulno lïu i lu puzuvuku ci cmalu mensi zoü sei la sipsmacu cu mutce sutra tolsisti zo elsis faü zo lesis faü zo tilis my cmene · i my xabju le loldi be lo jintykea lïu i lu ma my cidja sei la alis noi roroi se cinri loe düu citka je pinxe makau cu cusku lïu i lu loe satyjisra my cidja sei la sipsmacu ba le nu pensi zea lo mentu be li jïire cu cusku lïu i lu kaü kaenai goï sei la alis xendo te pinka · i vaodaïku my bilma lïu i lu jaa goï sei la sipsmacu cu cusku · i bae mutce le ka bilma lïu i la alis troci le nu se xanri le nu le tolfadni ke jmive tadji cu simsa makau · i küi dukse le ka cfipu abu · isekïubo abu dïa cusku lu · i küi kïu ma my xabju le loldi be lo jintykea lïu i lu ko zaüreü pinxe lo tcati sei la cibmasti cicyractu fi la alis mutce junri se cusku lïu i lu mi noroi pu pinxe sei la alis se cnixai spuda · isenïibo mi kaenai zaüreü goï lïu i lu do skudji le düu do kaenai bae meïreü pinxe sei la mapypre cu cusku · i frili fa le nu zaünoreü goï lïu i lu noda cpedu le bae do seljinvi sei la alis cusku lïu i lu ma cusku loi prenu pinka caku sei la mapypre cu jinga reisku lïu i la alis na kakne le nu spuda lae dïu · isekïubo abu sezyseü le nu cpacu lo tcati e lo nanba joi matne kei gïebabo rereü te preti fo la sipsmacu fi lu kïu ma my xabju le loldi be lo jintykea lïu i la sipsmacu zaüreü pensi zea lo mentu be li jïire gïe ba bo cusku lu jy satyjisra jintykea lïu i lu oonai no goï cu zasti sei la alis coa fengu cusku lïu · i küi la mapypre e la cibmasti cicyractu cu bacru zoi sance c c sance · i la sipsmacu cu pante te pinka fi lu vao le nu do na kae clite kei ee do seadai mulgau le lisri lïu i lu na goï · i eo do jaa dïa goï sei la alis mutce cumla cusku i mi na ba zaüreü zunti · i ïa cumki fa le nu bae pa goa cu zasti lïu i lu zasti jüo sei la sipsmacu cu se sïarxai cusku lïu · i küi sy nalpro le nu dïa coe · i lu lei bïunai ci cmalu mensi noi tao cilre fi le nu te pixra lïu i lu pixra ma my sei la alis noi cao tolmorji le se nupre cu cusku lïu i lu loe satyjisra sei caku la sipsmacu secau le nu pensi cu cusku lïu i lu mi djica loe jinsa kabri sei la mapypre cu zunti · i eü romïo muvdu le lamji stuzi lïu i my muvdu ca le nu cusku · i la sipsmacu my jersi · i la cibmasti cicyractu cu muvdu le pu se zvati be la sipsmacu · i la alis noi banzu naldjica cu basti la cibmasti cicyractu le ka ceü zvati makau · i la mapypre poo cu se prali da le nuncenba · i la alis se tolprali lo mutce kïu le nu la cibmasti cicyractu puzi falcru le ladru botpi le cycy palta i la alis na djica le nu zaüreü cnixai la sipsmacu gïesekïubo kajde ke tolsti cusku lu mi na jimpe · i my cpacu loe satyjisra ma lïu i lu kaü kae cpacu loe djacu loe djacu jintykea sei la mapypre cu cusku · isïa lïa kae cpacu loe satyjisra loe satyjisra jintykea vau iepei doi bebna lïu i lu küi my bae nenri le jintykea sei la alis fi la sipsmacu cu cusku co naljundi be le romoi pinka lïu i lu lïa goï sei la sipsmacu cu cusku · i jintykea nenri lïu i le danfu tai mutce cfipu la alis uu jae le nu curmi le nu la sipsmacu cao coe zea lo nu abu na zunti i lu my cao cilre fi le nu te pixra sei la sipsmacu dïa coe lïu i sy sipfru gïe mosra lei sy kanla kïu le nu coa sipydji · i lu my te pixra soï klesi be loe dacti · i ro da poi zo my pamoi lei cmene be kea lerfu lïu i lu kïu ma zo my sei la alis cusku lïu i lu kïu ma naku daï sei la cibmasti cicyractu cu cusku lïu i la alis cu smaji i la sipsmacu bao gaorgau lei kanla ca lae dïu gïe cao coa sipna i küi sy ca le nu se tunta la mapypre cu zaüreü cikybïo gïe cmalu krixa gïe dïa cusku lu lïo ro da poi zo my pamoi lei cmene be kea lerfu · i müa lo mirli terkavbu e lo mluni e lo mojrango e lo mutce · i kaü da kae mutce · i xu do süoroi viska lo pixra be lo mutce lïu i lu jeü uarüe sei la alis mutce se cfipu cusku · i peï na goï lïu i lu ei vao lae dïu do na tavla sei la mapypre cu cusku lïu i le dïu se tolclite cu zmadu le sarji selkae be la alis · i abu selrigni gïe saïrbïo gïe too cadzu · i la sipsmacu cu zeï sipybïo · i no le re drata cu jundi le nu abu cliva · i abu jïireroi trixe catlu fau le nu xadba pacna le düu le remei cu klacpe abu · i le remei ca le nu romoi se viska abu cu troci le nu setca la sipsmacu le tcati patxu i lu ai mi noroi zaüreü klama bae tu sei la alis ca le nu pluta sisku pao le ricmei cu cusku · i traji le kambebna lei tcati kansïu poi mi pagbu ca le nu mi jmive lïu i abu ca le nu cusku dïu cu coa sanji le nu pa le tricu cu ve vorme le ty nenri · i lu cizra sei abu pensi · i küi ro da cizra ca le cabdei · i peï ai mi cazi nerkla lïu · i abu nerkla i abu cu zaüreü zvati le clani kumfa gïe jibni le cmalu ke blaci jubme · i lu ee mi xagmau snada ca le ca krefu sei abu sezysku lïu · i pamai abu jgari le cmalu ke solji ckiku gïe telcaugau le vorme be le purdi · i remai abu coa citka le mledi noi pu punji lo spisa be kea le daski küo coü le nu abu cenmitre li jïicino · i cimai abu cadzu pao le cmalu vorlüa · i bae romai uo abu zvati le melbi purdi gïe jbini lei carmi ke xrula zdani e lei lenku milxe jaurjinto 8 nïonïo bimoo noltrunïu kelcrkroke bo foldi i lo barda ke rozgu tricu cu jibni le vorme be le purdi · i le rozgu poi xrula ty cu blabi · i küi ci purdykurji cu cintygaï ry loe xunre · i la alis pensi jivni le düu mutce cizra kei gïe jbimaukla tezüe le nu catlu · i abu ca le nu bao klama cu tirna le nu pa le purdykurji cu cusku lu oï doi mum ko na renro lo cinta mi lïu i lu oi mi pu kaenai rivbi sei la mum cusku · i la zel catke le mi bircidni lïu i ca lae dïu la zel galcatlu gïe cusku lu ee doi mum ko roroi zungygau lo drata lïu i lu ei bae do na tavla sei la mum cusku · i tïe la noltrunïu cu xusra ca le purlamdei le düu ei vimcu le stedu do lïu i lu ma krinu sei le tavla pamoi cu cusku lïu i lu lae dïu bae do na cuntu doi rel sei la zel cusku lïu i lu bae jaa goï sei la mum cusku · i ai mi ta jungau · i krinu fa le nu sabji loi tulji genja enaibaïbo loi sluni le jukpa lïu i la zel bikygau le burcu gïe coa cusku lu ua verai lei ro toldra lïu · icabo le zy kanla cu cunso se farna la alis noi sanli gïe catlu lei purdykurji · i zy zeï sezydicra · i lei drata jïa cu trixe catlu · i ro boi py dizlo krobïo i lu eo do mi jungau sei la alis toldarsi milxe cusku le düu kïu ma do cintygaï lei va rozgu lïu i la mum e la zel cusku noda gïe catlu la rel · i la rel coa kandi voksa cusku lu jeü saü doi citnïu ei ti bae xunre rozgu tricu · i mïa pu srera le nu sombo lo blabi · i ro mïa romüei le düu la noltrunïu cu facki lae dïu cu ba katna te vimcu le stedu · i toü saü doi citnïu mïa zukte le mïa xagrai pu le nu ny klama lïu · i caku la mum noi pu cao xanka catlu le purdi cu krixa lu la noltrunïu · i la noltrunïu lïu · i le ci purdykurji cu sezreo jae le nu le flira cu cpana le loldi · i sance soï nu stapa · i la alis sruri catlu gïe djica loe nu viska la noltrunïu i klama pamoi fa pano sonci noi bevri loi grana · i sy mintu le purdykurji le ka makau tarmi ceü · i clani kurfa gïe plita gïe se kojna loe xance e loe jamfu · i jersi fa lei pano nolkansa noi ricfu se jadni loi tabjme gïe remei cadzu düi tüa lei sonci · i jersi fa lei noltru panzi noi panomei · i lei cmalu dirba cu gleki plipe klama co xance jgari remei · i roboi py se jadni loi risna · i jersi fa lei vitke · i soeboi vy noltrunau ja noltrunïu · i la alis fakyvïa la blabi ractu noi jbini vy · i ry sutra je xanka tavla gïe cisma frati ro se cusku gïe zoa klama secau loe nu sanji abu · i jersi fa la risna nolseü noi bevri le noltrunau mapku sepïo lo zirxüe ranbüu kicne · i romoi le banli dzupoi fa bae le risna ke noltru remei i la alis senpi le düu xukau ei cnita flira vreta tai tüa lei ci purdykurji · i küi abu na morji le düu tïe lae dïu dzupoi javni · i lu jïa ma ma prali loe dzupoi sei abu pensi romüei le düu ei ro da cnita flira vreta jae le nu kaenai viska dy lïu · isekïubo abu sanli le se zvati gïe denpa i roda ca le nu le dzupoi cu crane la alis cu sisti gïe catlu abu · i la noltrunïu cu junri cusku lu ti mo lïu · i ny dïu cusku la risna nolseü noi spuda fi poo le nu krobïo je cisma i lu doi bebna sei la noltrunïu cu sutydji cusku lïu · i faa la alis ny dïa cusku lu ma do cmene doi verba lïu i lu zo alis mi cmene doi banli nobli sei la alis clite mutce cusku lïu · i küi abu jmina sezysku lu ua ta karda gaï romei · i ei mi ta na terpa lïu i lu bae ti mo lu se cusku la noltrunïu noi farjao lei ci purdykurji noi vreta rüu le rozgu tricu · i ny ca le nu py cnita flira vreta kei kïu le nu le trixe morna cu mintu le me ro drata moi cu kaenai djuno le düu py purdykurji jikau sonci jikau nolkansa jikau panzi be ny cimei i lu aücüi sei la alis noi se spaji le nu darsi cu cusku · i na cuntu bae mi lïu i la noltrunïu cu binxo lo xunzïu rïa le nu fengu · i ny ba le nu catlu abu zi lo mokca tai tüa lo cilce danlu cu krixa lu ko le stedu ta vimcu · i ko lïu i lu nonselsmu sei la alis cladu je birti cusku lïu · i la noltrunïu cu smaji i la noltrunau cu punji le xance le birka be la noltrunïu gïe toldarsi cusku lu ko pensi doi dirba le nu ta verba lïu i la noltrunïu cu torni too la noltrunau gïe cusku lu ko ta faergau lïu la nolseü i la nolseü cu kurji mutce faergau sepïo lo jamfu i lu ko sanli sei la noltrunïu cu cpina je cladu voksa cusku lïu i le ci purdykurji zeï saïrbïo gïe coa korcu rinsa la noltrunau e la noltrunïu e le noltru panzi e ro le drata i lu ko ta sisti sei la noltrunïu cu krixa · i do mi tolylaxygau lïu · i faa le rozgu tricu ny dïa cusku lu do ma cao vi zukte lïu i lu doi banli nobli sei la rel ca le nu cpanygau lo cidni le foldi cu cumla mutce tonga cusku · i mïa troci lïu i lu jee lïa sei la noltrunïu noi pu cao lanli lei rozgu cu cusku · i ko le stedu ta vimcu lïu · i le dzupoi cu dïa muvdu · i ci le sonci cu stali müi le nu selmidycatra lei se malfüa purdykurji noi bajra faa la alis müi le nu se marbi i lu do le stedu na ba te vimcu sei la alis cusku lïu · i abu punji py lo barda ke xrula patxu noi vi zvati · i le ci sonci cu sruri klama je sisku zea lo mentu be li jïire gïebabo smaci jersi lei drata i lu xu le stedu bao se vimcu sei la noltrunïu cu krixa lïu i lu le stedu bao canci doi banli nobli sei lei sonci cu spuda krixa lïu i lu ïe sei la noltrunïu cu krixa · i xu do kae kelcrkroke lïu i lei sonci cu smaji gïe catlu la alis kïu le nu lïa dïu preti fo abu i lu goï sei la alis krixa lïu i lu jao ee sei la noltrunïu cu camkïa lïu · i la alis jorne le dzupoi gïe kucli le düu makau ba fasnu i lu y melbi · i y melbi donri sei lo mutce toldarsi se voksa nea abu cusku lïu · i abu cao cadzu nea le blabi ractu noi zeï catlu le abu flira i lu mutce sei la alis cusku · i la noltronïu ma zvati lïu i lu oï oï sei la ractu cu lauble je sutra tonga cusku lïu · i ry xanka catlu gaü le janco ca le nu tavla kei gïe sezgalgau co cpana lei jmadegji gïe jbigau le moklu le abu kerlo gïe lauble cusku lu ri ba se selmidycatra lïu i lu ma krinu sei la alis cusku lïu i lu xu do pu cusku lu mi kecti lïu sei le ractu cu retsku lïu i lu na goï sei la alis cusku · i mi nasai kecti · i mi pu cusku lu ma krinu lïu lïu i lu ny darxi lei kerlo be la noltrunïu sei la ractu coa cusku lïu · i la alis cmila krixa · i lu oï sei la ractu cu terpa tonga laurblesku · i la noltrunïu do ba tirna · i noï ny pu lerci klama · i la noltrunïu cu cusku lïu i lu ko zvati le medomoi sei la noltrunïu cu lidvru voksa cusku lïu · i lei prenu coa bajra faa roda gïe jalsïu · i küi bredi zi lo mentu be li jïire · i le nu kelci cu cfari · i la alis jinvi le düu noroi le nunjïe pu viska lo tai kelcrkroke foldi · i cpana joi skuro · i le bolci cu jmive jesymabru · i le mruli cu jmive fagycpi · i le sonci cu krosaïbïo fi lei xance ku joi lei jamfu jae le nu bargu i le ralju be lei nandu be la alis ca le cfari cu nu jitro le fagycpi · i abu snada le nu kufra banzu punji le fy xadni noi le tuple cu dandu küo le cnita be le abu birka · i küi taeku fy ca le nu ge le cnebo moü sirji gi abu bredi le nu darxi le jesymabru le fy stedu cu torni gïe catlu faa le abu flira gïe se cfipu frumu jae le nu abu kaenai rivbi le nu spoja cmila · i ca le nu abu bao punji le fy stedu le dizlo gïe püo zaüreü coa coe cu xajmi mutce fa le nu facki le düu le jesymabru pu nalbolbïo gïe cao klama lo darno · i jïa taeku lo cmana a lo skuro cu zunti ca le nu abu djica le nu benji le jesymabru i la alis kïu le nu le korcu sonci roroi saïrgau gïe dzukla lo drata pagbu be le foldi cu jivbïo le düu le nunkei jaa mutce le ka nandu i ro le kelci cu kelci ca le mintu gïe na denpa le me ky moi gïe rüi toltugni gïe damba fi lei jesymabru · i baziku la noltrunïu cu fengu cinmo gïe cao marxa cadzu gïe krixa lu ko le stedu ta vimcu lïu a lu ko le stedu tu vimcu lïu jïiparoi ro mentu i la alis coa cinmo le ka tolkufra · i ïa abu zao na damba la noltrunïu gïe küi djuno le düu kae bazi fasnu · i lu vao lae dïu sei abu pensi mi mo · i vi nelci loe nu vimcu loe stedu loe prenu · i manci mutce fa le nu da stali le ka jmive lïu i abu sisku loe tadji be le nu zïerbïo kei gïe pensi le düu xukau kae cliva secau le nu se viska · icabo abu coa sanji lo cizra tolcanci ne le vacri · i ty cfipu abu ca le cfari · i küi abu ba le nu catlu ty zea lo mentu be li jïire cu facki le düu ty nu cisma kei gïe sezysku lu ua la tcicymlatu · i caku mi da kae tavla lïu i lu do mo sei la mlatu ca le nu le laü moklu cu banzu loe nu tavla cu cusku lïu i la alis denpa le nu lei kanla cu tolcanci · ibabo abu tüifru · i lu na prali fi le nu tavla ta kei sei abu pensi pu le nu zvati fa le kerlo adoanai süo ri lïu · i za lo drata mentu le mulno stedu cu tolcanci · i la alis toljgari le fagycpi gïe coa te lisri le nunkei gïe cinmo le ka gleki le nu da abu tirna · i la mlatu cu simlu le ka jinvi le düu pirau boi my ca se viska · i no drata pagbu be my cu tolcanci i lu mi na jinvi le düu tu cao stace kelci sei la alis coa pante tonga cusku · i ro tu daartaa jae le nu na kae tirna le nu tavla · i tu simlu le ka na steci javni fi ceü · ija doanai noda vao le nu de jaa javni cu jundi de · i do na se xanri le düu tai makau cfipu fa le düu ro le dacti cu jmive · i müa le bargu poi ei mi ca pagre cu coa cadzu le drata fanmo be le foldi · i mi püo darxi le jesymabru pe la noltrunïu · ije küi ue jy too bajra ca le nu viska le nu le memimoi cu jbikla lïu i lu do nelci la noltrunïu selaü ma sei la mlatu cu lauble voksa cusku lïu i lu li no sei la alis cusku · i ny mutce lïu · icaku abu sanji le nu la noltrunïu cu jibni trixe abu gïe tirna · i sekïubo dïa cusku lu le ka lakne fa le nu ceü jinga · isekïubo na vamji le temci fa le nu moü kelci lïu i la noltrunïu cu cisma gïe pagre i do ma tavla sei la noltrunau cu cusku lïu · i ny klama la alis gïe mutce se cinri catlu le stedu be la mlatu i lu ta mi pendo · i ta tcicymlatu sei la alis cusku · i eapei mi do ta pengau lïu i lu mi nasai nelci le nu ta simlu makau sei la noltrunau cu cusku · i küi ea ta cinba le mi xance vao le nu pluka ta lïu i mi zmanei le nu na goï sei la mlatu cu te pinka lïu i lu ko na tolsïa sei la noltrunau cu cusku · i ko mi na catlu tai ta lïu · i ny klama le trixe be la alis ca le nu tavla i lu loe mlatu kae catlu loe noltrunau sei la alis cusku · i mi pu tcidu dïu lo cukta · i küi mi na morji le düu cy mokau lïu i lu ei ta se vimcu sei la noltrunau cu jdice cusku lïu · i ny skutaa la noltrunïu noi ca jibni pagre lu au doi dirba do da vicygau le vi mlatu lïu i la noltrunïu cu cikre taï pada ro nabmi noi barda ja cmalu · i lu ko le stedu ta vimcu sei ny secau le nu faa catlu cu cusku lïu i bae mi klagau le selmïecatra sei la noltrunau cu sutydji cusku lïu · i ny sutra klama i la alis cu jdice le düu xruti gïe viska le nu le nunkelci cu mokau · icabo abu tirna le darno voksa be la noltrunïu noi cinmo krixa i abu bao tirna le nu ny minde le nu ci kelci cu se catra kïu le nu ky na kelci ca le me ky moi · i abu nae nelci le jvinu be le cuntu kïu le nu le nunkelci cu mutce le ka cfipu kei jae le nu abu noroi djuno le düu xukau ca ei kelci · i sekïubo abu coa sisku le abu jesymabru i le jesymabru cao damba lo drata jesymabru · i la alis jinvi le düu lae dïu xautce le nu kelcrkroke darxi pa cy le drata · i le poo nabmi cu nu le abu fagycpi bao klama le drata fanmo be le purdi gïe büu tolsnada troci gaa la alis le nu volkla lo tricu i ca le nu abu le fagycpi bao kavbu gïe xrugau kei ge le nundamba cu mulno gi lei re jesymabru na se viska · i lu küi na vajni mutce sei la alis pensi · i ro le dargu cu canci le vi mlana be le foldi lïu · i abu punji fy le cnita be le abu birka jae le nu na kae zaüreü cliva kei gïe xruti le nu jmina tavla le pendo i abu ca le nu bao xruti tüa la tcicymlatu cu se spaji le nu facki le düu lo prenu soïmei bao jmaji le sruri be ty · i daarsïu fa le selmïecatra ku joi la noltrunau ku joi la noltrunïu vüo noi ro lüa kea cu tavla ca le mintu ca le nu ro drata cu smaji mutce gïe tolkufra simlu i la alis ca le nu tolcliva cu te cpedu le nu jdice le cuntu kei ro lüa le cimei · i küi abu kïu le nu ro ri tavla ca le mintu cu mutce le ka se nandu le nu jimpe le düu makau se cusku i le seldau be le selmïecatra zoü kaenai katna vimcu lo stedu secau loe nu da poi xadni zoü kae katna vimcu le stedu da · i sy noroi pu zukte lo simsa · i ai na coa goï ca le sy ca nunjmive pagbu i le seldau be la noltrunau zoü ro da poi kea se stedu zoü da kae se sedycaugau · i ei na cusku lo nonselsmu i le seldau pe la noltrunïu zoü ga da se zukte seraa le cuntu zi lo mleca be lo temci pinosïe gi ny ba minde fi le nu ro de se catra to le romoi pinka cu rinka le nu piro le kansïu cu simlu le ka mutce le ka junri je xanka toi i la alis kaenai pensi le nu cusku nae bo lu ta se ponse la noltronïu · i eü preti ta ko bae ny lïu i lu ny pinfu sei la noltrunïu fi le selmïecatra cu cusku · i ko ny ti klagau lïu · i le selmïecatra cu klama tai tüa loe danti i le stedu be la mlatu coa kadzea ca le nu sy cliva kei gïe bao müo canci ca le nu sy xruti co kansa la noltronïu · isekïubo la noltrunau e le selmïecatra cu cilce bajra gïe sisku my ca le nu lei drata cu dïa kelci 9 nïonïo somoo lisri fi la jitfa cakyrespa i lu do kaenai pensi le nu selaü makau mi gleki le nu mi do zaüreü viska doi dirba slabu sei la noltronïu cu cusku lïu · i ny xendo tagygau le ny birka le me la alis moi · i ny joi abu kansïu le nu cadzu cliva i la alis mutce gleki le nu zgana le nu ny pluka tarti · i abu pensi le düu jüocüi le tsaprpiperi cu rinka le nu ny cilce ca le nu abu penmi ny le jupküa i lu ca le nu bae mi noltronïu kei sei abu to sepïonai küi lo pajna mutce tonga toi sezysku nosai tsaprpiperi ba zvati le mi jupküa i loe stasu cu xamgu secauku · i cumki fa le nu roroiku loe tsaprpiperi cu rinka loe nu loe prenu cu cpina tarti sei abu mutce se pluka be le nu facki lo cnino javni · i loe sarvanju cu rinka le nu py slari tarti · i loe spatrkamomili cu rinka le nu py kurki tarti · i y i loe bavmi sukta a loe simsa cu rinka loe nu loe verba cu titla tarti i au loe prenu cu djuno lae dïu jae loe nu py na mobdüa sy lïu i caku abu nalmoï fi la noltronïu gïe milxe se spaji ca le nu tirna le ny voksa noi jibni le abu kerlo · i lu do da pensi doi dirba i lae dïu rinka le nu do tolmoï le nu ei tavla · i mi kaenai ca cusku le sedüu lae dïu makau madnïi · i küi mi bazi morji lïu i lu jüocüi madnïi noda sei la alis darsi te pinka lïu i lu eï doi verba sei la noltronïu cu cusku roda de madnïi · i sarcu fa le nu facki lïu · i ny laïrzea la alis ca le nu tavla i la alis na mutce nelci le nu tai jibni ny gepamai kïu le nu la noltronïu cu mutce le ka tolmelbi giremai kïu le nu ny satci ke galtu mapti le nu vregau le firjïo le abu janco · i se tolkufra kinli firjïo i küi abu na nelci le nu tolclite · isekïubo abu renvi serai le ka xamgu kei verai lei selkae be abu i lu le nunkei cao xagzea sei abu setaï le nu stogau le nunsnu cu cusku lïu i lu ie goï sei la noltronïu cu cusku · i lae dïu madnïi lae lu üe nu prami · i le nu prami cu rinka le nu le munje cu carna lïu lïu i lu tïe rinka sei la alis lauble cusku fa le nu roda jundi le cuntu be da lïu i lu ïa aünai mintu fi le ka smuni sei la noltronïu noi caergau le kinli je cmalu firjïo le janco be la alis cu cusku · i lae dïu madnïi lae lu ko kurji le smuni · isevaobo le sance voa kurji lïu lïu i lu ua ti nelci le nu facki le düu ro da makau madnïi sei la alis pensi lïu i lu jüo do pensi sezretsku le sedüu makau krinu le nu mi na srupunji le mi birka le do xadmidju sei ba lo nundenpa la noltronïu cu cusku · i krinu fa le nu mi nae lacri le do fagycpi le nu tarti · i eüpei mi troci le nu cipra lïu i lu cumki fa le nu fy batci sei la alis noi nasai xankydji le nu troci le nu cipra cu spuda lïu i lu jeüsai sei la noltronïu cu cusku ge loe fagycpi gi loe sansrmustardo cu batci · i lae dïu madnïi lae lu loe cipni poi pimlu dunli ckaji cu roroi jmaji lïu lïu i lu küi loe sansrmustardo na cipni sei la alis te pinka lïu i lu drani uecüi sei la noltronïu cu cusku · i ïo le nu do cusku cu klina le nu jimpe lïu i lu sy kunra bae peï sei la alis cusku lïu i lu lïa goï sei la noltronïu noi simlu le ka bredi le nu tugni la alis roda cu cusku · i lo barda ke sansrmustardo terkunra vi jibni i lae dïu madnïi lae lu le nu loe memimoi cu zenba cu panra le nu loe medomoi cu jdika lïu lïu i lu ua kaü sei la alis noi na jundi le romoi pinka cu krisku · i sy stagi · i sy le ka goï cu na catlu gïeküi jaa ckaji lïu i lu mi do jaasai tugni sei la noltronïu cu cusku · i lae dïu madnïi lae lu ko ckaji le se simlu be do lïu · i vaï saü lu ko noroi se xanri le nu do na ckaji naeboda poi do simlu fi lei drata fe le ka de poi do caa ja nüo ckaji kea na drata di poi do simlu kea lei drata lo drata lïu lïu i lu peï mi kae xagmau jimpe lae dïu sei la alis clite mutce cusku vao le nu ciska · i küi mi kaenai jimpe ca le nu do cusku lïu i lu dïu novae cïu loe mi kae se cusku be vao le nu mi cuxna sei la noltronïu cu se pluka tonga spuda lïu i lu eo ko ko na raktu le nu cusku sepïo lo clamau sei la alis cusku lïu i lu oa na raktu sei la noltronïu cu cusku · i mi dunda ro ca bao se cusku be mi do lïu i lu tolkargu seldunda sei la alis pensi · i mi gleki le nu na tae tai dunda ca le jbedetri te salci lïu · i küi abu na darsi le nu cladu cusku i lu xu zaüreü pensi sei la noltronïu ca le nu zaüreü caergau le kinli je cmalu firjïo cu te preti lïu i lu mi zifre le nu pensi sei la alis noi coa xanka cu kinli cusku lïu i lu düi loe nu zifre sei la noltronïu cu cusku fa loe xarju le nu vofli · i lae dïu madnïi lïu i caku la alis mutce se spaji le nu le voksa be la noltronïu cu canci cajïasai le midju be le ny se nelrai valsi noü zo madnïi · i le birka poi jorne le abu birka cu coa desku · i la alis catlu · i la noltrunïu cu caü sanli · i ny se polje se birka gïe lindi simsa frumu i lu xamgu donri doi nolbaï sei la noltronïu coa lauble je ruble voksa cusku lïu i lu oï pae sei la noltrunïu ca le nu darxi le loldi le jamfu cu krixa do a le do stedu cu ei se vimcu · i goï zeï pimu lo temci nomei i ko cuxna lïu i la noltronïu cu cuxna gïe zi bao cliva i lu eü mïo dïa kelci sei la noltrunïu fi la alis cusku lïu · i la alis cu dukse le ka terpa kei gïe cusku no valsi gïeküi masno jersi ny faa le kelcrkroke foldi i le nu surla büu le ctino cu prali lei drata vitke le nu la noltrunïu cu nalzvati · i küi vy ca le nu viska ny cu zi sutra le nu xruti le nu kelci · i la noltrunïu cu te pinka fi poo le düu lo mokca nunlerci cu se jdima lei vy nunjmive i zea piro le nunkei la noltrunïu noroi dea damba lei drata kelci gïe noroi dea krixa lu ko le stedu ta vimcu lïu a lu ko le stedu tu vimcu lïu · i lei se dapma be ny cu se klagau lei sonci noi lïa dea bargu · i ba za lo cacra be li jïipimu ge no bargu cu zvati gi ro le kelci poü naebo la noltrunau a la noltrunïu a la alis cu pinfu gïe se dapma fi le nu se selmïecatra ibabo la noltrunïu cu tatpi cliva gïe cusku fi la alis fe lu xu do pu viska la jitfa cakyrespa lïu i lu na goï sei la alis cusku · i mi na djuno jïasai le düu makau jitfa cakyrespa lïu i lu te zbasu loe jitfa cakyrespa bo stasu sei la noltrunïu cu cusku lïu i mi pu noroi ga viska cy gi se tavla fi cy sei la alis cusku lïu i lu ee mïo klama sei la noltrunïu cu cusku · i ba lisri cy boi cy do lïu i la alis ca le nu cliva cadzu cu tirna le nu la noltrunau cu lauble voksa cusku fi lei zvati fe lu ro do se fraxu lïu · i lu rïe lae bae dïu xamgu sei abu sezysku · i abu pu cinmo le nu tolgei le nu la noltrunïu cu minde xokau nuncatra i bazibo penmi la cpicinfo noi sipna mutce vreta le se solgüi to eü ko vao le nu na djuno le düu makau cpicinfo cu catlu le pixra toi · i lu ko sanli doi lazni sei la noltrunïu cu cusku · i ko klagau le vi citno ninmu le nu viska la jitfa cakyrespa gïe tirna le cy lisri · i ei mi xruti gïe jitro soo nuncatra noi mi pu minde lïu · i ny cadzu cliva la alis noi stali tüa la cpicinfo · i la alis na mutce le ka nelci le jvinu be le danlu · i küi abu pensi le düu se snura dunli fa le nu stali cy kei le nu jersi le cilce noltrunïu · i sekïubo abu denpa i la cpicinfo cu tsebïo gïe mosra lei kanla gïebabo catlu la noltrunïu coü le nu ny na kae se viska kei gïebabo cmila · i lu üisai sei la cpicinfo cu cusku seï seïnai lïu i lu üi bae mo sei la alis cusku lïu i lu ue tu sei la cpicinfo cu cusku · i roda tu xanri · i jüo noroi selseïcatra da · i ei klama lïu i lu roda cusku zo ei büuku sei la alis ca le nu masno jersi cy cu pensi · i mi pu tai se minde noroi le mi nunjïe lïu i le remei pu le nu veü klama cu viska la jitfa cakyrespa noi zu badri je nonkansa zutse lo cmalu ke rokci ctebi · i la alis ca le nu jbikla cu tirna le nu jycy vruvaü tai le nu mutce badri · i abu carmi le ka kecti jycy · i lu tu ma badri sei abu fi la cpicinfo cu retsku lïu · i le cpicinfo cu spuda sepïo lei valsi poi jibni mintu lei pu valsi küo lu roda tu xanri · i jüo tu node badri · i ei klama lïu i le remei cu klama la jitfa cakyrespa noi catlu sepïo loi barda je selkakclu kanla gïeküi cusku noda i lu le vi citno ninmu zoü sei la cpicinfo cu cusku ti djica le nu djuno fi le do lisri · i goï lïu i lu mi ti ly tavla sei la jitfa cakyrespa cu condi je kunti tonga cusku · i eü le re do tsebïo gïenai cusku lo valsi pu le nu mi moü coe lïu i le remei cu tsebïo · i no da tavla zea lo mentu be li soo · i la alis pensi lu mi na jimpe le düu ta kae moü coe taï makau vao le nu ta na coa coe lïu gïeküi tolxanka denpa i lu puku sei la jitfa cakyrespa cu condi vruvasxu cusku mi jetnu cakyrespa lïu i lei dïu valsi cu se jersi lo nu zeü smaji noi zunti kea fa poo le rüinai me zo xyjyckryrx se krixa be la cpicinfo e le rüi tilju nunvruvasxu be la jitfa cakyrespa · i la alis püo saïrbïo je cusku lu kïe doi prenu mi do ckire le do cinri lisri lïu gïe küi na kae rivbi le nu pensi le düu ei dajïa jersi · i sekïubo abu smaji zutse gïe cusku noda i lu ca le nu mïa cmalu sei la jitfa cakyrespa noi ca surla zenba gïe küi rüinai zao milxe vruvasxu cu dïa cusku mïa ve ckule le xamsi · i le ralju cu junri je tolcitno cakyrespa gïe se cmene lu ractu cafmïa lïu mïa lïu i lu kïu ma doo te cmene ra lu ractu cafmïa lïu vao le nu ra genai ractu ginai cafmïa sei la alis te preti lïu i lu mïa te cmene ra lu ractu cafmïa lïu kïu le nu ra ctuca mïa sei la jitfa cakyrespa cu fengu cusku · i jeü do bebna mutce lïu i lu ei do ckeji le nu cusku lo tai sampu preti sei la cpicinfo cu jmina cusku lïu · ibabo le remei cu smaji zutse gïe catlu la alis uu noi cinmo le nu bredi le nu se tunlo le terdi · ibazubo la cpicinfo cu cusku fi la jitfa cakyrespa fe lu ee doi slabu ko na coe zea piro le donri lïu · i jycy dïa cusku dïe i lu keü mïa te ckule le xamsi · iju do lae dïu na krici lïu i lu mi noroi cusku le sedüu mi na krici sei la alis cu zunti lïu i lu do jaa goï sei la jitfa cakyrespa cu cusku lïu i lu ko rïurgau le tance sei la cpicinfo pu le nu la alis kae zaüreü tavla cu jmina cusku lïu · i la jitfa cakyrespa cu dïa coe i lu mïa cilre fu le xagrai · i jeü mïa zvati le ckule ca ro donri lïu i lu mi jïa zvati lo donri ckule sei la alis cusku · i ei do na tai jgira lïu i lu xu cilre fi le seljmina sei la jitfa cakyrspa cu xanka milxe retsku lïu i lu goï sei la alis cusku · i mïa cilre fi le fasybau e le zgike lïu i lu xu goï fi le nu lumci sei la cakyrespa cu cusku lïu i lu lïa na goï sei la alis fengu cusku lïu i lu ua le medomoi na mutce le ka xamgu ckule sei la jitfa cakyrespa cu surbïo mutce tonga cusku · i le dejnoi be fi le memïamoi cu se fanmo lu le fasybau e le zgike bae e le nu lumci cu seljmina lïu lïu i lu do na mutce le ka nitcu ly sei la alis cusku vao le nu xabju le xamsi loldi lïu i lu mi na kakne le nu pleji sei la jitfa cakyrespa cu vruvasxu cusku · i mi cilre le fadni poo lïu i lu fy mo sei la alis retsku lïu i lu lïa pamai nu ctidüe gïe cïiska sei la jitfa cakyrespa cu spuda · i remai le vo pagbu be le nacycmaci beo noü le nu jminae e le nu vimcüa e le nu piljïe e le nu fendea lïu i lu mi na jimpe fi zo jminae sei la alis cusku darsi · i kïa lïu i la cpicinfo cu spaji lafti le re xance · i lu ue paunai xu na jimpe fi zo jminae sei cy kïasku · i rüa jeüpei do jimpe fi zo natfe lïu i lu goï sei la alis senpi cusku · i le düu da de natfe cu se smuni le düu da onai de kae jetnu lïu i lu jao sei la cpicinfo dïa cusku do natfe jimpe · i do jaa bebna vao le nu do na jimpe natfe jimpe lïu i la alis na darsi le nu zaüreü te preti lae dïu · i abu faa la jitfa cakyrespa cu cusku lu do cilre fi ma jïa lïu i lu le cridyske sei la jitfa cakyrespa noi kancu lei seltadni sepïo lei limnaï cu cusku · i le cridyske noü le prutce e le cabna geü e le xasyske · i jïa le nu pixraï zoü le pixraï ctuca cu tolcïo sincyfïe noi zvati paroi ro jeftu · i ctuca fo le nu pixraï gïe grasüu cintai finti lïu i lu aü lae dïu mo sei la alis cusku lïu i lu bae mi kaenai jarco sei la jitfa cakyrespa cu cusku · i mi dukse le ka tinsa · i jïa la cpicinfo noroi cilre lïu i lu claxu loe temci sei la cpicinfo cu cusku · i mi zvati le dzeklu ctuca · i ri tolcïo xasyjukni · i goï lïu i lu mi ri noroi zvati sei la jitfa cakyrespa cu vruvasxu cusku i ri ctuca fo tïe le clacmo e le geisto lïu i lu goï · i goï sei la cpicinfo noi jïa vruvasxu cu cusku lïu · i le re danlu cu gairgau le voa xance le voa flira i lu pau do cilre ca ro donri zea lo cacra be li xo sei la alis noi djica le nu sutra galfi le selsnu cu cusku lïu i lu zea lo cacra be li pare ca le pamoi donri e le remoi donri sei la jitfa cakyrespa cu cusku · i li so le cimoi e le vomoi · i li xa le mumoi e le xamoi · i lïolïo lïu i lu cinri selpla sei la alis kïasku lïu i lu lae dïu krinu le nu zo CIlRE cmene · i jdika le ka temci kei lo cacra be li bae CI ca ro djedi be li bae RE lïu i le sidbo cu mutce cnino la alis · i abu zea pensi pu le nu te pinka fi lu jao jeüpei ca le somoi donri e le panomoi donri cu zifre lïu i lu jeü lïa goï sei la jitfa cakyrespa cu cusku lïu i lu mo ca le papamoi donri sei la alis dïa kucli cusku lïu i lu lae dïu banzu seraa le nu ckule sei la cpicinfo cu jditce tonga zunti · i caku ko ta tavla lei nu kelci lïu 10 nïonïo panomoo xasyjukni vonseldansu i la jitfa cakyrespa cu condi vruvasxu gïe mosra le trixe be pa le limnaï lei kanla gïe catlu la alis gïe troci le nu tavla · i küi zea lo mentu be li jïire loi nu vruvasxu cu dicra le voksa · i lu mintu loe nu lo bongu cu zunti le galxe sei la cpicinfo cu cusku lïu · i cy coa gunka le nu desygau gïe darxi fo le trixe · ibazabo la jitfa cakyrespa cu xruti le ka se voksa kei gïe dïa selklaku flira cusku lu jüocüi do na zeü xabju le xamsi cnita tosaa lu mi na goï sei la alis cusku lïu toi · i jüocüi do noroi penmi lo xasyjukni tosaa la alis coa cusku lu mi paroi vüirgae lïu gïe küi sutra sezydicra gïe cusku lu noroi goï lïu toi · isekïubo do na kae se xanri le nu loe xasyjukni vonseldansu cu mokau kukte lïu i lu ie na goï sei la alis cusku · i ri mo seldansu lïu i lu taa doü sei la cpicinfo cu cusku · i pamai lei dansu pada se linji paa le xamsi korbi lïu i lu bae reda sei la jitfa cakyrespa cu krixa · i loe pinpedi ku ceo loe cakyrespa ku ceo loe salmone ku ceo da sïa lïo · ibabo ba le nu moü vimcu ro mivjau le jvinu lïu i lu lae dïu tae zeü coe sei la cpicinfo cu zunti lïu i lu ee reroi crakla lïu i lu roda kansa lo xasyjukni sei la cpicinfo cu krixa lïu i lu lïa sei la jitfa cakyrespa cu cusku · i ee reroi crakla · i ee penmi le kansa lïu i lu ee cajysïu lei xasyjukni · i ee xruti poï le mintu sei la cpicinfo cu dïa coe lïu i lu babo jüi doü sei la jitfa cakyrespa dïa cusku · i ee renro lïu i lu fe lei xasyjukni sei la cpicinfo noi plipe le vacri cu krixa lïu i lu fi le xamsi serai le selkae ka darno lïu i lu ee limna jersi lei xasyjukni sei la cpicinfo cu krixa lïu i lu ee pipcarna neï le xamsi sei la jitfa cakyrespa cu krixa lïu i lu ee zaüreü cajysïu lei xasyjukni sei la cpicinfo cu voksa cladu traji krixa lïu i lu ee xruti le tumla · i moü pamoi morna sei la jitfa cakyrespa noi suksa jdikygau le voksa cu cusku lïu · i le re danlu noi pu rüu plipe zea lae dïu tai loe nu fenki cu badri je smaji tsebïo gïe catlu la alis i lu jüodaï melbi seldansu sei la alis toldarsi cusku lïu i lu aüpei do viska lo mupli sei la jitfa cakyrespa cu cusku lïu i lu aüsai goï sei la alis cusku lïu i lu ee mïo troci le nu pamoi morna sei la jitfa cakyrespa fi la cpicinfo cu cusku · i mïo sea kakne secau loe xasyjukni · i ma sanga lïu i lu ïe bae do goï sei la cpicinfo cu cusku · i mi tolmorji lei valsi lïu i coa junri dansu rüu la alis · i rüinai stapa lei abu jmadegji ca le nu dukse jbikla · i sligau lei xance tezüe le nu sinxa le rilti izeabo la jitfa cakyrespa cu masno je badri mutce sanga lu eo sutra doi cakcurnu · i ko tïa zgana ua pa xajyfïe noi jbitrixe gïe me mi rebla stapa i ui aa ro le jukni e le respa ca se ganse gïe denpa mi le canre · i pei do ba kansa dansu i aipei naipei aipei naipei aipei do ba dansu i aipei naipei aipei naipei naipei do ba dansu i do kaenai se xanri le nu pluka co mokau ca le nu mïo se renro fi le xamsi ïa au i dardukse · i dardukse sei cy spuda tolselmansa doi merlanu kïe küi · i mi na ba kansa dansu i ainai einai ainai einai ainai mi ba dansu i ainai einai ainai einai einai mi ba dansu i na selvai le ni darno sei le pendo zeï frati i iasai lo drata korbi caa drata mlana zvati i le ni darno le glico cu ni jibni be la frans i ko carna doi cakcurnu · i ei do ba kansa dansu i aipei naipei aipei naipei aipei do ba dansu i aipei naipei aipei naipei naipei do ba dansu lïu · i lu kïe · i le nu dansu zoü mutce cinri fa le nu catlu sei la alis noi mutce gleki le nu uo mulno cu cusku · i mi jaasai nelci le cinri selsanga be seraa loe merlanu lïu i lu aa loe merlanu zoü sei la jitfa cakyrespa cu cusku do my pu caa viska lïapei lïu i lu goï sei la alis cusku · i mi my soïroi viska vi le sairpaln- sei abu sutra sezydicra lïu i lu mi na djuno le düu makau stuzi la sairpaln sei la jitfa cakyrespa cu cusku · i küi do vao le nu tai soïroi viska my cu se slabu lïa le nu makau my jvinu lïu i lu ia sei la alis pensi spuda le my rebla cu nenri le my moklu · i my cpana loe nabyspi lïu i lu do srera tüa loe nabyspi sei la jitfa cakyrespa cu cusku · i loe nabyspi cu se jisybïo vao loe nu jinru le xamsi · i küi le my rebla jaa nenri le my moklu · i lae dïu se krinu sei caku la jitfa cakyrespa cu sipfru ke kanla gaorgau · i ko ta tavla le krinu e ro srana sei fi la cpicinfo cu cusku lïu i lu se krinu sei la cpicinfo cu cusku le nu my bae jaa kansa loe xasyjiknu le nu dansu · i sekïubo my se renro fi le xamsi · i sekïubo my farlu lo darno · i sekïubo my carmi setca le rebla le moklu i sekïubo my kaenai tolsetca · i uo lïu i lu kïe sei la alis cusku · i cinri mutce · i mi pu noroi djuno lo tai mutce loe merlanu lïu i lu doa mi do kae tavla lo se jmina sei la cpicinfo cu cusku · i xu do djuno le düu makau krinu le nu zo labyfïe cmene loe merlanu lïu i lu mi lae dïu noroi pensi sei la alis cusku · i ma krinu lïu i lu my kurji loe jufra e loe selsku sei la cpicinfo cu junri spuda lïu i la alis mulno le ka se cfipu · i lu uanai kurji loe jufra e loe selsku sei abu preti tonga rapsku lïu i lu aa do ma pilno le nu kurji loe do selsku sei la cpicinfo cu cusku · i vaï ma cipra le ka gendra lïu i la alis zea pensi pu le nu danfu · i lu la jbofïe cu goï peï lïu i lu ie la lobyfïe vaïnai · i le genra nïa le xamsi sei la cpicinfo cu dïa condi voksa cusku cu se cipra lo labyfïe · i kaüdai lïu i lu mi romüei le düu mi merlanu cu cusku sei la alis noi zao pensi le selsanga cu cusku fi le xajyfïe fe lu fïinai doü eo darsta · i mïa na djica le nu do mïa kansa lïu lïu i lu bilga le nu xy kansa sei la jitfa cakyrespa cu cusku · i no clite finpe cu rivbi lo xajyfïe lïu i lu ue jeüpei sei la alis spaji mutce tonga cusku lïu i lu lïa goï sei la jitfa cakyrespa cu cusku · i müa vao le nu lo finpe cu te preti fo mi kei mi cusku lu do ma friti le do xajyfïe lïu lïu i lu xu do skudji zo xasyvïe sei la alis cusku lïu i lu mi skudji loe se cusku be mi sei la jitfa cakyrespa cu jgicro tonga spuda lïu · i la cpicinfo cu minsku lu ee do mïa tavla süo le do selfri lïu i lu mi do kae tavla le mi selfri pe coa le zi cerni sei la alis toldarsi milxe cusku · i küi na prali fi le nu peixru le purlamdei · i kïubo mi drata prenu ca py lïu i lu ko ciksi piro lae dïu sei la jitfa cakyrespa cu cusku lïu i lu oonai na goï · i pamai loe selfri sei la cpicinfo cu sutydji tonga cusku · i loe velcki cu zeü oi coe lïu i la alis coa tavla fi lei abu selfri pe coa le nu pareü viska la blabi ractu · i abu milxe le ka xanka lae dïu kei ca le cfari · i le re danlu abu mutce jibni gïe mlana · i dy ganra mutce kargau lei kanla e le moklu · i küi abu zenba le ka darsi ca le nu cao coe · i lei se tirna cu prane smaji coü le nu abu pencu le pagbu pe seraa le nu abu sitsku lu do tolcitno doi paf uiliam lïu la ciftoldi fau le nu lei valsi cu fricybïo · icaku la jitfa cakyrespa cu zeü sakyvasxu gïe cusku lu lae dïu mutce le ka cizra lïu i lu traji le ka cizra fo lei cizra sei la cpicinfo cu cusku lïu i lu roda fricybïo sei la jitfa cakyrespa rereü pensi cusku · i mi djica le nu tirna le nu ta ca troci le nu sitsku da · i ko ta skumïe le nu coa coe lïu · i jycy catlu la cpicinfo tai le nu jinvi le düu cy catni la alis i lu ko saïrbïo gïe sitsku lu lazni se voksa lïu sei la cpicinfo cu cusku lïu i lu ue lei danlu cu mutce minde gïe gasnu le nu sitsku loi selcli sei la alis pensi · i dunli loe nu mi ve ckule lïu · i küi abu saïrbïo gïe coa sitsku · i küi le abu menli cu culno le xasyjukni vonseldansu jae le nu abu jaarüe djuno le düu abu cusku makau · i lei valsi caa cizra mutce barkla · i lu xasyjukni se voksa · i cusku ia tïe lu do mi zao jukpa · i ei gau kresïe lïu gïe zbipilno le nu voa cnici le ka dasri joi batke e ro sïa vrici i ca le nu le canre cu sudga ku cmila gïe tavla co ckasu brafïe se cfila i ii küi ca le nu le xamsi cu banro kei le voksa cu binxo lo sance tolkanro i lu dïu frica le tae se cusku be mi bei ca le nu mi verba sei la cpicinfo cu cusku lïu i lu jüa mi dïu pu noroi tirna sei la jitfa cakyrespa cu cusku · i küi simlu le ka nalfadni nonselsmu lïu i la alis noda cusku · i abu cao zutse to le flira cu se sarju le xance toi gïe kucli le düu xukau ca de ba zaüreü rarna fasnu i lu mi djica le nu ciksi fi mi sei la jitfa cakyrespa cu cusku lïu i lu ta kaenai ciksi sei la cpicinfo cu sutra cusku · i ee dïa coe le jersi pempau lïu i lu küi lei batke xu sei la jitfa cakyrespa cu zao coe · i taï bae ma pilno le nazbi le nu cnici lïu i lu pamoi be lei nundansu stapa sei la alis cusku lïu · i küi abu mutce se cfipu piro le cuntu gïe djica le nu le selsnu cu cenba i lu ee dïa coe le jersi pempau sei la cpicinfo rereü naldenpa cusku · i coa coe lu mi pagre le purdi lïu lïu i la alis na darsi le nu na tinbe · i abu birti le düu ba srera barkla gïe dïa desku voksa cusku lu mi pagre le purdi · i ïe se funjdi i le ctecpi le tirxu vi kansa lo nuncti i ty le se snuji e ia le te snuji cu citka ca le nu cy cpacu le smuci i ba le nu mulno uo kei cy te dunda le palta noi kea cy kae se tunta i ca le nuncabna le tirxu cu brejbi le nu pilno le dakfu – i lu ma prali fi le nu sitsku ro dïu sei la jitfa cakyrespa cu zunti vao le nu do na cao ciksi · i traji le ka cfipu kei fo lei mi se tirna lïu i lu goï · i peï ei sisti sei la cpicinfo cu cusku lïu · i la alis mutce le ka gleki le nu tai zukte · i lu eüpei mïa troci lo drata morna be fi le xasyjukni vonseldansu sei la cpicinfo cu dïa cusku · iji aupei la jitfa cakyrespa cu sanga da do lïu i lu ae eo sanga peü doi jitfa cakyrespa sei la alis spuda lïu · i le nu abu tai sutra spuda cu rinka le nu la cpicinfo cu cusku sepïo lo jgicro tonga lu ïa kaenai jimpe le nu makau pluka · i ko sanga lu cakyrespa stasu lïu ta vau aipei doi slabu lïu i la jitfa cakyrespa cu condi vruvasxu gïe coa sanga dïe sepïo lo voksa noi sooroi dicra melbi bo stasu ricfu je crino denpa fi lo vaurcnino i pronalkae kukselzbasu stasu co vanci melbi bo stasu stasu co vanci melbi bo stasu me–elbi bo sta–asu me–elbi bo sta–asu sta–asu co va–a–anci melbi bo melbi bo stasu melbi bo stasu · i roda kecti le reücti ja fïecti i no da xanka le nu ckasu da le nu djica le melbi bo stasu da le nu djica le melbi bo stasu me–elbi bo sta–asu me–elbi bo sta–asu sta–asu co va–a–anci melbi bo melbi – BO STAsu i lu ee rapli sei la cpicinfo cu krixa lïu · i la jitfa cakyrespa puzi coa rereü sanga ca le nu lo selkrixa noü lu le nunpai cu cfari lïu darno se tirna i lu ee sei la cpicinfo cu krixa lïu · i cy jgari la alis fo le xance gïe sutra cliva gïe na denpa le nu moü sanga i lu le nunpai cu mo sei la alis vaxyselnandu cusku ca le nu bajra · i küi la cpicinfo cu spuda lu ee lïu poo gïe sutyzea bajra cao le nu blezea to se bevri le brife poi jersi voa toi fa lei badri valsi poü dïe sta–asu co va–a–anci melbi bo melbi bo stasu 11 nïonïo papamoo ma zerlea lei rutytisna i la risna noltrunau e la risna noltrunïu cu zutse le voa nolstizu ca le nu abu joi cy tolcliva · i lo barda soïmei cu jmaji le sruri · i ro klesi be loi cmalu cipni joi danlu beo e jïa le karda romei · i le nolseü cu sanli caü le remei gïe se rinju lo linsi gïe jbini lo sonci remei noi fanta · i jibni la noltrunau fa la blabi ractu noi jgari nüi ge lo tabra lo xance gi lo skapi te ciska clanu le drata · i satci midju le kumfa fa lo jubme noi se cpana lo barda palne be loi rutytisna noi tai xamgu se jvinu jae le nu la alis xagji rïa le nu catlu · i lu au mulgau le nunpai sei abu pensi gïe fairgau le cidja lïu · i küi lae dïu simlu le ka na lakne · i sekïubo abu coa catlu ro sruri be abu tezüe le nu le temci cu culno i la alis pu noroi zvati loe nunpai kumfa gïe küi pu caa tcidu lo srana be ky loi cukta gïe se pluka le nu facki le düu djuno le düu makau cmene soa zvati · i lu ta pajni sei abu sezysku kïu le nu ta dasni lo barda krebasti lïu i tao le pajni cu du la noltrunau noi dasni le nolmapku loe cpana be le krebasti to ko catlu le craxra vao le nu do djica le nu viska le nu dasni taï makau toi gïenaisai simlu le ka kufra · i jüo na melbi mapti i lu ta pairkamni tsina sei la alis pensi · i lei va pare danlu to ei abu cusku zo danlu kïu le nu ge süo dy mabru gi süo dy cipni toi cu pairkamnycmi peï lïu · i abu jïiciroi cusku le romoi valsi gïe jgira mutce kïu le nu jinvi to drani toi le düu soüsai cmalu nixli le me abu moi cu djuno le düu makau smuni · i küi zo paicmi jïa mapti banzu i ro le pare pairkamnycmi cu zuktce ciska fi lo tanbo · i lu tu ma zukte sei la alis fi la cpicinfo cu tolylau cusku · i tu kaenai ciska da pu le nu le nunpai cu cfari lïu i lu tu ciska le tu cmene sei la cpicinfo cu tolylau spuda kïu le nu terpa loe nu tolmorji pu le fanmo be le nunpai lïu i lu ue bebna sei la alis coa cladu je fengu voksa cusku lïu · i küi abu sutra sisti kïu le nu la blabi ractu cu krixa lu ei smaji büu le kumfa lïu · i la noltrunau coa dasni le vistci gïe xanka catlu le sruri tezüe le nu facki le düu makau tavla i la alis kae viska to frili tai le nu daï catlu gaü le janco be py toi le nu ro le pairkamnycmi cu ciska lu ue bebna lïu le py tanbo kei gïejïasai kae tilvïa le nu paboi py na se slabu lei lerfu pe zo bebna gïe nitcu le nu cpedu le nu se jungau kei le lamji · i lu ba melbi kalsa fa lei tanbo pu le nu le nunpai cu mulno sei la alis pensi lïu i pa le pairkamnycmi cu pilno lo pinsi noi vrumli cupra · i lïa la alis na kae renvi lae dïu gïe klama fo le sruri be le kumfa gïe tïerbïo py gïe bazi kakne le nu lebna le pinsi py · i abu tai sutra jae le nu le selkecti ke cmalu pairkamnycmi noü la bil poü le rebyrespa na kae facki le düu le pinsi makau binxo · isemüibo by ba le nu veü sisku py ro sruri cu bilga le nu ciska sepïo lo degji zea le djedi velvïu · i lae dïu tolmutce le ka prali kei kïu le nu noda sejae barna le tanbo i lu doi noisku ko tcidu le zerfuzyxüa selsku sei la noltrunau cu cusku lïu i caku la blabi ractu cu ciroi tolsakci le tabra gïe tolgurgau le skapi te ciska slanu gïe tcidu bacru dïe la noltrunïu pe le risna cu zbakukte loi rutytisna zea lo crisa djedi i le nolseü pe le risna cu zerlea loi rutytisna gïe darbevri bredi i lu ko pensi le do se paijdi sei la noltrunau fi le pairkamni cu cusku lïu i lu ei zao na goï · i ei zao na goï sei la ractu cu sutra zunti i ei lo mutce cu purci lae dïu lïu i lu ko klagau le pamoi zgana sei la noltrunau cu cusku lïu · i la blabi ractu cu ciroi tolsakci le tabra gïe krixa lu jüi pamoi zgana lïu i le pamoi zgana cu du la mapypre noi nerkla gïe jgari nüi ge lo tcati kabri le xance gi lo nanba joi matne le drata · i lu ko mi fraxu doi nolbaï sei my coa cusku le nu mi ti nerbevri · i küi mi na moü pinxe le tcati ca le nu mi se klagau lïu i lu ei do pu moü goï sei la noltrunau cu cusku · i ca ma do coa goï lïu i la mapypre cu catlu la cibmasti cicyractu noi pu klajeï my le kumfa gïe kansa la sipsmacu · i lu le pavomoi be le cibmasti peï sei cy cusku lïu i lu pamumoi sei la cibmasti cicyractu cu cusku lïu i lu paxamoi sei la sipsmacu cu jmina lïu i lu ko ciska lae dïu sei la noltrunau fi le pairkamni cu cusku lïu · i le pairkamni cu sutra ciska le ci detri le py tanbo gïe sujykanji fi dy gïe galfi le se kanji lo rupnu joi fepni i lu ko vimcu le do mapku sei la noltrunau fi la mapypre cu cusku lïu i lu ti na me mi moi sei la mapypre cu cusku lïu i lu zerlea sei la noltrunau faa le pairkamni cu kïasku lïu · i py zi notcïa le fatci i lu mi ti vecnu sei la mapypre cu jmina ciksi · i mi no ti ponse · i mi mapypre lïu i caku la noltrunïu coa dasni le vistci gïe coa zea catlu la mapypre noi labybïo gïe xanka tarti i lu ko dunda le do datni sei la noltrunau cu cusku · i ko na xanka · ija mi da do zivi catrymïe lïu i lae dïu nasai simlu le ka darsygau le zgana noi zao slilu fi le nu sanli fi lo jamfu ku faü le drata kei gïe xanka catlu la noltrunïu gïe se cfipu batyvïu lo barda spisa le tcati kabri ne sebaï le nanba joi matne i caku la alis ganse lo cizra noi cfipu abu coü le nu facki le düu makau fasnu · i abu cao coa zaüreü barda banro gïe pamai jdice le nu cliva le kumfa kei gïe küi remai jdice le nu stali zea le nu le canlu cu banzu i lu au do na tai catke sei la sipsmacu noi zutse lamji abu cu cusku · i mi kaerüe vasxu lïu i lu mi kaenai rivbi sei la alis cumla cusku · i mi cao banro lïu i lu ei do na vi banro sei la sipsmacu cu cusku lïu i lu ko na bebna tavla sei la alis darsyzea cusku · i jüo do jïa cao banro lïu i lu goï · i küi mi banro sekai lo ka racli sutra sei la sipsmacu cu cusku · i na tai ckasu goï lïu · i sy tolgei mutce saïrbïo gïe pagre le kumfa le drata fanmo i zea lae dïu la noltrunïu noroi sisti le nu catlu la mapypre kei gïe cusku ca le nu la sipsmacu cu pagre le kumfa kei fi pa le nunpai pulji lu ko bevri le liste be lei sanga pe le romoi ke zgike se tigni lïu · i la mapypre cu tai desku jae le nu le re cutci cu nalseldasybïo i lu ko dunda le do datni sei la noltrunau rereü fengu cusku · ija do te catrymïe gïu xanka lïu i lu mi pindi doi nolbaï sei la mapypre cu coa desku voksa cusku i mi puzi coa pinxe le mi tcati to zi lo jetfu be li jïisüepa toi · i le nanba joi matne cao cinlyzea · i le tcati cu tergüi lïu i lu le mo cu tergüi sei la noltrunau cu cusku lïu i lu ty pamoi lei goï sei la mapypre cu spuda lïu i lu lïa ty pamoi zo tergüi sei la noltrunau cu kinli cusku · i xu do jinvi le düu mi bebna · i ee dïa coe lïu i lu mi pindi sei le mapypre cu dïa coe · i soeda cu tergüi ba lae dïu · i küi la cibmasti cicyractu cu cusku lïu i lu mi na goï sei la cibmasti cicyractu cu sutra zunti lïu i lu do jaa goï sei la mapypre cu cusku lïu i lu mi tolxüa sei la cibmasti cicyractu cu cusku lïu i lu ta tolxüa sei la noltrunau cu cusku · i ko toljüi le dïu pagbu lïu i lu noï la sipsmacu cu cusku sei la mapypre cu dïa coe lïu · i my xanka ke sruri catlu tezüe le nu zgana le nu xukau sy jïa tolxüa · i küi sy tolxüa noda gïe carmi sipna i lu baku sei la mapypre cu dïa cusku mi zaüreü katna lo nanba joi matne lïu i lu küi la sipsmacu ma cusku sei pa le pairkamnycmi cu te preti lïu i lu mi ri na morji sei la mapypre cu cusku lïu i lu ei do morji sei la noltrunau cu notsku · ija mi da do catrymïe lïu i la mapypre noi dunku mutce cu falcru le tcati kabri e le nanba joi matne gïe sanli fi pa le cidni · i lu mi pindi doi nolbaï sei my coa coe lïu i lu do pindi le ka tavla certu sei la noltrunau cu cusku lïu i caku pa le smacrkobaiu cu geirkïa gïe bazi se rinju lei nunpai pulji to zo rinju cu rufsu valsi · i mi ciksi le nu taï makau zukte · i py ponse lo barda ke bukpu dakli noi kae ganlo sepïo loi dasri · i py le smacrkobaiu cu setca dy gïe zutse toi i lu mi gleki le nu mi viska lae dïu sei la alis pensi · i mi soïroi tcidu fi loi karni ca le moü nunpai lu troci le nu xanvruzau noi bazi se rinju lei nunpai pulji lïu gïe pu noroi jimpe le düu makau smuni lïu i lu ea do vao le nu lae dïu cu pirosïe le do se djuno be fi le cuntu cu nitkla sei la noltrunau cu dïa cusku lïu i lu mi kaenai klama lo nitmau sei la mapypre cu cusku · i mi cpana le loldi lïu i ea vao lae dïu do nitytse sei la noltrunau cu spuda lïu i caku le drata smacrkobaiu cu geirkïa gïe se rinju i lu aü moü smacrkobaiu sei la alis pensi · i caku mïa xagmau lïu i lu mi zmanei le nu moü tcati pinxe sei la mapypre cu cusku lïu i my xanka catlu la noltrunïu noi tcidu le liste be lei sanga i lu ea klama sei la noltrunau cusku lïu · i la mapypre cu sutra cliva le kumfa secau le nu denpa jïasai le nu dasni lei cutci i lu · ije ko le stedu tu vimcu büu le bartu sei la noltrunïu fi pa le pulji cu jmina cusku lïu · i küi la mapypre na kae se viska pu le nu le pulji cu tolcliva le vorme i lu ko klagau le jersi zgana sei la noltrunau cu cusku lïu i le jersi zgana cu du le jukpa pe la noltronïu · i jy jgari le tsaprpiperi tanxe le xance · i la alis cu smadi le düu du makau kei pu le nu jy klama le kumfa kei kïu le nu ro le prenu poi jibni le vorme cu coa senci i lu ko dunda le do datni sei la noltrunau cu cusku lïu i lu na goï sei le jukpa cu cusku lïu i la noltrunau cu xanka catlu la blabi ractu noi tolylau voksa cusku lu ei le nolbaï cu kuclanli le vi zgana lïu i lu ïa oo ïa sei la noltrunau cu tolgleki lïu · i ny ba le nu kucysimgau lei birka gïe frumu faa le jukpa coü le nu le ny kanla cu jibni le nu na kae se viska cu condi voksa cusku lu ma te zbasu loe rutytisna lïu i lu loe tsaprpiperi raü sei le jukpa cu cusku lïu i lu loe satyjisra sei lo sipna voksa noi trixe jy cu cusku lïu i lu ko selkarlygau la va sipsmacu sei la noltrunïu cu krixa · i ko le stedu ta vimcu · i ko ta barklagau le kumfa · i ko ta rinju · i ko ta tunta · i ko le zbikre cu vimcu lïu i zea lo mentu be li soo le kumfa cu kalsa cao le nu le sipsmacu gau barkla · i ca le nu cnici xruti kei le jukpa bao canci i lu na vajni sei la noltrunau cu surla mutce cusku · i ko klagau le jersi zgana lïu · i ny tolylau tonga jmina cusku fi la noltrunïu fe lu ïu doi dirba ei bae do kuclanli le jersi zgana · i le nu goï cu mutce corgau mi le sedycra lïu i la alis cu catlu la blabi ractu noi juxre coe le liste küo gïe mutce kucli le düu le jersi zgana cu mokau · i lu zao na mutce le ka datni sei abu sezysku lïu · i uedaisai la blabi ractu sepïo le kinli je cmalu voksa cu bacru tcidu le cmene poü zo alis 12 nïonïo paremoo le sidydatni poe la alis · i lu mi zvati sei la alis krixa lïu · i abu zeï tolmorji le düu abu bao banro lo mokau barda zea le puzi mentu be li soü · i abu tai sutra plipe jae le nu falgau le pairkamni tsina sepïo le skaci korbi gïe renro ro le pairkamnycmi lei stedu be le cnita premei · i lei pairkamnycmi cu kalsa preja · i lae dïu morjygau la alis fi lo nu abu se snuti le nu falgau lo slofïe tanxe ca le purlamjeftu i lu üu · i eosai ko mi fraxu sei abu dunku tonga kïasku lïu · i abu coa crepu lei pairkamnycmi le loldi rai le ka sutra kei kïu le nu le slofïe snuti zao stali le abu menli · i abu tolsatci te sidbo fi le düu ga zeï ei crepu gïe punji py le pairkamni tsina gi py ba mrobïo i lu le nunpai na kae dïa fasnu sei la noltrunau cu junri mutce voksa cusku pu le nu ro le pairkamnycmi cu xruti le drani selzva · i bae ro sei ny rereü basna mutce cusku lïu · i ny catlu la alis ca le nu cusku i la alis catlu le pairkamni tsina gïe viska le nu abu pu punji sejae le nu sutra kei le rebyrespa jae le nu le ry stedu cu cnita · i le se kecti cu sligau le rebla tai lo nu tolgei kei gïe kaenaisai muvdu · i abu boi ry bargau gïe drani punji · i lu na mutce le ka vajni sei abu sezysku · i peï le fatne le se fatne cu dunli le ka makau prali le nunpai ceü lïu i le pairkamni ca le nu ge py baorüe xruti fi le jenca poü le nu se dicra gi ro le tanbo e ro le pinsi cu se tolcirko gïe se dunda fi py cu coa tolylazni ciska lo lisri be le fasnu · i goï fa ro boi py poü nae bo le rebyrespa noi simlu le ka dukse le ka se sfasa kei le nu zukte lo drata be le nu kalri moklu zutse gïe gapru catlu le drudi be le kumfa i lu do ma djuno le cuntu sei la noltrunau fi la alis cusku lïu i lu noda sei la alis cusku lïu i lu xu nosai da sei la noltrunau cu zao coe lïu i lu nosai da sei la alis cu cusku lïu i lu lae dïu cu mutce le ka vajni sei la noltrunau faa le pairkamni cu cusku lïu · i py coa ciska dïu le tanbo ca le nu la blabi ractu cu zunti · i lu lïa zo tolvajni cu se skudji do doi nolbaï sei ry sinma mutce tonga cusku lïu · i küi ry frumu gïe flira snigau ca le nu tavla i lu lïa mi skudji zo tolvajni sei la noltrunau cu sutra cusku lïu · i ny cao tolylau sezysku lu vajni · i tolvajni · i tolvajni · i vajni lïu tai le nu cipra le ka makau pe ceü xagmau kei lei valsi i soo le pairkamnycmi cu ciska zo vajni · i soo boi py zo tolvajni · i la alis kae viska kïu le nu jibni co banzu le nu catlu lei py tanbo · i lu küi nasai vajni sei abu pensi sezysku lïu i caku la noltrunau noi pu zea zukte ciska fi le ny notci cukta cu cusku lu ei smaji lïu gïe bacru tcidu fi cy fe lu le voremoi javni zoü ro prenu poi galtu minli li zaüpa cu bilga le nu cliva le kumfa lïu i roda catlu la alis i lu mi na galtu minli li pa sei la alis cusku lïu i lu do goï sei la noltrunau cu cusku lïu i lu goï li jïire sei la noltrunïu cu jmina lïu i lu · iseju ainai mi cliva sei la alis cusku · ijïa jy na fadni javni · i do jy cazi finti lïu i lu jy tolcitrai lei javni pe le cukta sei la noltrunau cu cusku lïu i lu ganai goï gi ei jy pamoi sei la alis cusku lïu i la noltrunau cu labybïo gïe sutra polje le notci cukta · i lu ko pensi le do se paijdi sei la noltrunau fi le pairkamni cu lauble je desku voksa cusku lïu i lu lo drata datni zao ba se jarco peü doi nolbaï sei la blabi ractu noi sutra plipe cu cusku · i le vi pelji puzi se cpacu lïu i lu ma se ciska fi ta sei la noltrunïu cu cusku lïu i lu mi ti zao na kargau sei la blabi ractu cu cusku · i küi ti simlu le ka xatra fi le pinfu fe y da lïu i lu jüo goï sei la noltrunau cu cusku · ijonai ti xatra lo no da · i küi kaü lae dïu rirci lïu i lu ma se judri sei pa le pairkamnycmi cu cusku lïu i lu nasai se judri sei la blabi ractu cu cusku · i jeü no da se ciska fi le bartu lïu · i ry tolplo le pelji ca le nu tavla kei gïe jmina lu pae ti na xatra · i ti penpau selcmi lïu i lu xu le ciska tarmi cu me le pinfu moi sei lo drata pairkamnycmi cu te preti lïu i lu na goï sei la blabi ractu cu cusku · i lae dïu cu traji le ka cizra lïu to ro le pairkamnycmi cu simlu le ka se cfipu toi i lu jao py fukygau ta le ciska tarmi pe lo drata sei la noltrunau cu cusku lïu to ro le pairkamnycmi cu xruti le ka cikygei toi i lu peü doi nolbaï sei la nolseü cu cusku mi tu na ciska · i jïa no da kae jeürjao le düu mi jaa goï · i no cmene cu zvati le fanmo be tu lïu i lu le cuntu cu xlazea vao le nu do na ciska le do cmene sei la noltrunau cu cusku · i bae jüo do zukte fi le nu palci · ibo do romüei le düu na goï cu jaa pu ciska le do cmene tai tüa loe stace lïu i kampu fa le nu xanvruzau lae dïu noi pamoi co tolbebna selsku la noltrunau ca le cabdei i lu lae dïu cu jetyjao le düu ta zerzüe sei la noltrunïo cu cusku lïu i lu lae dïu cu jetyjao noda poi simsa sei la alis cusku · i ua do na djuno jïasai le düu makau se ciska lïu i lu ko tcidu sei la noltrunau cu cusku lïu i la blabi ractu coa dasni le vistci · i lu ei mi goï coa ma peü doi nolbaï sei ry retysku lïu i lu coa le krasi sei la noltrunau cu junri cusku ko cao goï coü le fanmo · ibabo ko sisti lïu i dïe penmi co se tcidu la blabi ractu i tïe do ta vitke caa i do tu tavla mi i cüu ta ge mi prezaa ginai mi limna di i cüu tu mi pu vi sanli to mïo djuno toi i ganai ta za zao lanli gi ma do dimna oi i dunda fa mi pa da ta i goï re da tu i do se xruti le ro da noi me mi moi za pu i ga nai ga mi gi ta iu se cuntu le vi fasnu gi ia tu lacri do le nu do zifre xruti gasnu i peï do pu le nu tcini le nu se fengu ta cu fanta zunti gïe jbini uo tu joi mi joi ra i tu na djuno ei gau ko le düu ta ru zmanei i ei se mipri mi joi do ro drata le nu ca nei i lu lae dïu cu vajrai lei datni poi se tirna ca le cabdei sei la noltrunau noi simymosra lei xance cu cusku · i sekïubo ei le pairkanmi lïo lïu i lu mi vao le nu py dïu kae ciksi sei la alis cusku to abu banro lo tai barda zea le puzi mentu be li soü jae le nu abu nasai terpa le nu zunti ny toi cu dunda lo rupnu py · i bae mi na jinvi le düu lo smuni selci jïasai cu zvati dïu lïu i ro le pairkamnycmi cu ciska fi le tanbo fe lu bae ta na jinvi le düu lo smuni selci jïasai cu zvati dïu lïu gïenai küi troci le nu ciksi le pelji i lu le nu noda smuni dïu sei la noltrunau cu cusku cu fanta lo barda raktu kïu le nu einai mïa troci le nu facki lo smuni · i küi jüocüi sei ny noi kea lei penpau cu pejgau le cidni gïe catlu sepïo pa kanla cu dïa cusku · i peï mi viska lo smuni · i loü ginai mi limna di lïu · i jüi doü jeüpei do kaenai limna di sei ny faa la nolseü cu jmina lïu i la nolseü cu badri daskygau le stedu · i lu xu mi simlu le ka kae goï sei ny cusku lïu to jüosai ny noi marji lo jarple cu na simlu toi i lu ïe sei la noltrunau cu cusku lïu · i ny dïa tolylau bacru lei penpau · i lu lu to mïo djuno toi lïu mapti lïa le pairkamni · i lu · i dunda fa mi pa da ta · i goï re da tu lïu · i ua jüo lae dïu nu ta fairgau lei rutytisna lïu i lu küi dïa coe lu · i do se xruti le ro da lïu sei la alis cusku lïu i lu ua ry zvati ta sei la noltrunau noi jarco lei rutytisna noi cpana le jubme cu jinga cusku · i noda kae klimau lae dïu · i küi lu pu le nu tcini le nu se fengu ta lïu · i do noroi fengu doi dirba peï jeüpei sei ny fi la noltrunïu cu cusku lïu i lu noroi sei la noltrunïu cu fengu mutce cusku lïu · i ny renro lo xinmo vasru le rebyrespa ca le nu tavla · i to la bil uu pu dea ciska fi le tanbo lo degji · imüibo dy na mornygau · i küi by cazi dïa coe sepïo le xinmo noi carvi le by flira küo zea le nu xy renvi toi i lu sekïubo lei valsi do na mapti sei la noltrunau cu cusku lïu i ny cisma catlu le sruri · i morsi smaji i lu mi pu vlakei sei la noltrunau cu jgicro tonga jmina lïu · i roda cmila · i lu eï le pairkamni cu pensi le se paijdi sei la noltrunau jïirenoreü le djedi cu cusku lïu i lu na goï · i na goï sei la noltrunïu cu cusku · i le se sfamïe cu pamoi · i le se paijdi cu zaümoi lïu i lu bebna je nonselsmu sei la alis cladu cusku · i ionai oi pamoi fa le se sfamïe lïu i lu ko rïurgau le do tance sei la noltrunïu noi zirpu binxo cu cusku lïu i lu ai mi na goï sei la alis cu cusku lïu i lu ko le stedu ta vimcu sei la noltrunïu cu voksa launrai krixa lïu · i no da muvdu i lu ma do terpa sei la alis noi ca bao banro le abu tae barda cu cusku · i gaï do nae drata lo kardymei lïu i caku le karda romei cu tolfarlu le vacri gïebabo farlu la alis i abu milxe krixa rïa lo nunterpa züu e lo nunfengu züunai gïe troci le nu rivbi ky · i abu facki le düu abu vreta le rirxe korbi fau le stedu cu cpana le galtupcra be le mensi noi xendo vimcu loi morsi pezli noi bao farlu le abu flira lei tricu i lu ko cikna doi alis doi dirba sei le mensi cu cusku · i ue do zeü sipna lïu i lu üe mi senva lo tai cizra sei la alis cusku lïu · i abu tavla le mensi ro le cizra se lifri poi do kea puzi cao tcidu · i le mensi ca le nu moü goï cu cinba abu gïe cusku lu jeü jüo cizra se senva doi dirba · i küi ko ca bajra klama tüa le tcati · i cao lerci binxo lïu · i la alis saïrbïo gïe bajra gïecabo pensi le düu le se senva cu se manci kei pae i küi le mensi cu zutse zao le nu abu cliva kei gïe vregau le stedu le xance gïe catlu le nu le solri cu farlu kei gïe pensi le cmalu noü la alis geü e ro le abu se manci se lifri · i le mensi jïa coa senva saenai · i senva lae dïe i pamai my senva la alis · i lei abu cmalu xance cu zaüreü cao jgari le my cidni · i lei abu carmi selcïi kanla cu catlu lei me my moi · i my kae tirna le satci tonga be fi le abu voksa gïe viska le cizra nu stedu desku noi se rinju le kerfa le nu gacri lei kanla · i ca le nu my tirna gïa simlu le ka tirna cu jmive binxo rüusai my fa lei cizra tigni be le se senva be le my cmalu mensi i le clani srasu cu vruvricypra büu lei my jamfu ca le nu la blabi ractu cu sutra klama · i la smacu noi terpa cu jacreo pagre le jibni laücma · i my tirna le sance be lei tcati kabri ca le nu la cibmasti cicyractu cu kansa lei cycy pendo le zee nu sanmi · i le cpina voksa be la noltrunïu cu minde fi le nu lei ny malselfüa vitke cu se catra · i le xarju cifnu cu zaüreü senci gaüreo le cidni be la noltronïu ca le nu loi palta ku joi loi palne cu sruri porpi · i zaüreüku le selkrixa be la cpicinfo le snamli be le tanbo pinsi pe le rebyrespa le se zunvaü be lei smacrkobaiu zoü le romei cu se tisna le vacri gïe jorne le darno kaksna be la tolgeitce ke jitfa cakyrespa i my zao zutse to lei kanla cu ganlo toi gïe xadba krici le düu my zvati la selmacygüe · iküi my djuno le düu le nu kargau ky cu banzu le nu roda binxo loe tolzdi fatci · i le srasu cu vruvricypra gau le brife · i le laücma cu se boxna gau lei jauspa · i le sance be lei tcati kabri cu binxo le se lanjanbe · i le cpina se krixa be la noltrunïu cu binxo le voksa be le lankurji nanla · i le nunsenci be le cifnu le selkrixa be la cpicinfo ro le drata ke cizra savru zoü le romei cu binxo sei my djuno le mixre sance be le zukcfu cange · i le se cmoni be lei zu bakni cu basti lei tilju kaksna be la jitfa cakyrespa i romai my se xanri le nu le my cmalu mensi ca le balvi cu makcu ninmu gïe ralte zea lei makcu nanca le sampu je prami risna pe le vercedra gïe jajgau le cymy cmalu panzi gïe gasnu le nu lei bae py kanla cu carmi se cinri soï cizra lisri e jüocüi jïasai le se senva pe la puzu selmacygüe kei gïe cinkansa py lei py sampu se tolgei gïe se pluka lei py sampu se gleki gïe morji le cymy verba nunjïe e lei selgei ke crisa djedi fao